Friday, 1 September 2023

Ordinansa sa pag-issue sa building permit sulod sa CADT 252, ipatuman sa Buenavista

DAKBAYAN SA BUTUAN -- Ubos sa Municipal Ordinance No. 015-2023 nga gipangamahanan ni Buenavista SB member Datu Manlig-onan Rolando S. Lanapan sa Buenavista ipatuman na sa lokal nga panggamhanan sa maong lungsod ang guidelines sa pag-isyu og building permits sa mga lugar nga nasulod sa Certificate of Ancestral Domain Title (CADT) 252 sa lungsod sa Buenavista, Agusan del Norte.

Gipalabang kini nga ordinansa aron maprotektahan ang katungod sa mga Indigenous Cultural Communities/Indigenous Peoples (ICCs/IPs), ug pagpatuman sa mga plano, programa, proyekto, ug mga kalihokan alang sa IPs lakip  sa ilang mga yutang kabilin nga sakop sa CADT 252 aron masiguro ang ilang ekonomikanhon, sosyal ug kultural nga kaayohan.

Sumala pa sa maong ordinansa, walay building ug accessory permit ang i-isyu gawas kon mosunod sa mga kondisyones nga gitakda sama sa pagkuha’g barangay clearance, plans ug specifications sa gambalay nga tukuron, ug  National Commission on Indigenous Peoples (NCIP) certification.

Base sa rekomendasyon sa SP Committee on Ways and Means diin tsirman si Bokal Francisco Y. Chan Jr., ang nasangpit nga ordinansa gi-aprobahan sa SP pinaagi sa Sanggunian Resolution No. 427-2023. (JO Mellejor, PLGU Agusan del Norte)