324 ka pamilya nakabenepisyo sa nakumpletong water system sa Las Nieves
Sumala ni Hilda Zambrano, ang provincial area coordinator sa Kapit-Bisig Laban sa Kahirapan-Comprehensive and Integrated Delivery of Social Services (Kalahi-CIDSS) program sa Department of Social Welfare and Development (DSWD) nga ang pagrepair sa water system nagsugod niadtong February 27, 2023.
Nakumpleto kini niadtong April 14, 2023 ug pormal nga gi-turnover ang maong proyekto sa katawhan sa duha ka purok niadtong Martes, Agosto 8.
“Usa sa priority sa Kalahi-CIDSS mao ang pagpahiluna sa mga proyekto alang sa paghatag og mainum nga tubig sa katawhan ilabi na sa kabarangayan,” matud pa ni Zambrano.
Ang repair sa water system gipondohan sa Kalahi-CIDSS og P735,540 samtang ang lokal nga panggamhanan adunay counterpart nga P173,387 nga cash ug P4,000 nga in-kind.
Ang Barangay E. G. Montilla migahin usab og P1,000 cash ug P18,900 nga in-kind nga counterpart aron makumpleto ang repair.
“Mapasalamaton kami sa panggamhanan, ilabi na sa DSWD ug sa LGU Las Nieves kay nahuman na gayud ang pag repair sa among water system,” padayag ni Alona Daal, taga-Purok 2 sa E.G. Montilla.
Iyang gidugang nga siya ug ang ubang pamilya sa ilang purok boluntaryong mitabang sa pagrepair sa water system.
Malipayon nga misaksi sa pag turnover si Dioscora Mendez nga taga Purok 4 tungod kay matud pa niya anaa na sa duol ang kakuhaan nilag tubig nga mainum ug magamit sa panimalay. (LGU Las Nieves/PIA Agusan del Norte)
