Mga barangay sa Las Nieves, nakabenepisyo sa AguSerbisyo Caravan
LAS NIEVES, Agusan del Norte -- Gipangunahan ni Agusan del Norte Gov. Maria Angelica Rosedell Amante, kauban si Mayor Karen Rosales ug mga ahensiya sa panggamhanan ang paghatod sa sebisyong medikal ug uban pa, alang sa siyam ka mga barangay sa Las Nieves pinaagi sa AguSerbisyo Caravan niadtong Agosto 1 sa Marcos Calo Elementary School.
Gawas sa Barangay Marcos Calo, ang mga barangay nga nahatagag serbisyo sa caravan mao ang Tinucoran, Poblacion, Malicato, Bonifacio, Katipunan, Rosario, San Isidro, ug San Roque.
Liboan ka mga residente nga gikan sa maong mga barangay ang direktang nakabenipisyo sa AguSerbisyo Caravan.
Ang mga libreng serbisyo milangkob sa vaccination, minor surgeries, tuli, electrocardiogram (ECG), check-up, ug pagpang-apod-apod sa mga tambal ug bitamina sa mga bata.
Nahatagan sab og mga libreng seedlings ang mga mag-uuma gikan sa siyam ka mga barangay nga nahimutang sa eastern side sa Las Nieves.
“Gihimo kining AguSerbisyo Caravan aron mapaduol ang gobyerno sa inyong tugkaran,” pahayag ni Silver Joy Tejano, ang Provincial Social Welfare and Development officer sa Agusan del Norte.
Sa iyang mensahe, gipadayag ni Gov. Amante ang tinguha sa provincial government nga matagamtaman sa katawhan ang serbisyo sa panggamhanan.
“Angay gayud ninyo kining matagamtam tungod kay kamo man ang hinungdan sa among pagpanerbisyo,” matud pa sa gobernador.
Nagpasalamat ang mayor sa provincial government sa padayong paghatag og suporta ngadto sa katawhan sa Las Nieves, ilabi ang mga anaa sa mga lagyong barangay.
“Bulahan kita kay ang provincial government, lakip na ang mga ahensiya sa gobyerno, mao na ang naghatud niining mga serbisyo kanato,” matud pa ni Mayor Rosales.
Gipasabot usab sa mayor ang pagka-matinud-anon sa panggamhanan sa paghatag og kaayohan ngadto sa katawhan, lakip ang mga IP communities sa lungsod.
Si Indigenous Peoples Mandatory Representative Hawudon Tandawon Armando H. Una II nalipay sa mga serbisyong nadawat sa mga IPs atol sa AgusSerbisyo Caravan.
“Dako akong pasalamat sa atong gobernador ug mayor kay ang tribong komunidad sa Marcos Calo ug ubang barangay nakatagamtam sa mga serbisyo sa probinsyal nga panggamhanan,” padayag ni IPMR Una.
Mitambong usab sa maong aktibidad ang mga miyembro sa Sangguniang Panlalawigan sa Agusan del Norte ug Sangguniang Bayan sa Las Nieves. (LGU Las Nieves/PIA Agusan del Norte)
