Las Nieves DRRMC nakab-ot ang Beyond Compliant sa Gawad KALASAG
LAS NIEVES, Agusan del Norte -- Gi-ila na usab nga “Beyond Compliant” ang Las Nieves Municipal Disaster Risk Reduction and Management Council kon MDRRMC.
Ang pasidungog sa lungsod nahigayon niadtong Lunes, Agosto 14, sa Butuan City atol sa 2023 Regional Gawad KALASAG Search for Excellence in Disaster Risk Reduction and Management (DRRM) and Humanitarian Assistance gikan sa Caraga Disaster Risk Reduction and Management Council (DRRMC) nga gipangunahan sa Office of Civil Defense (OCD) Caraga.
Ang Las Nieves ang usa sa 33 ka munisipyo sa Caraga Region nga nakadawat sa maong pinakataas nga award ug lakip sa 6 sa 11 ka munisipyo sa Agusan del Norte.
Ang Gawad KALASAG kon KAlamidad at Sakuna LAbanan, SAriling Galing ang Kaligtasan usa ka plataporma nga nagahatag pasidungog ug pag-ila ngadto sa mga LGUs nga nagasubay sa tukmang pagpadagan sa local DRRM offices/councils.
Kini gimando sa Section 11 ug 12 ubos sa Republic Act 10121 o ang Philippine Disaster Risk Reduction and Management Act of 2010.
Personal nga gidawat ni Mayor Karen Rosales ang Plaque of Recognition sa Las Nieves isip Beyond Compliant Awardee sa Gawad KALASAG.
Kauban sa mayor nga midawat sa maong pasidungog si Jover Manliguez, ang Municipal Disaster Risk Reduction and Management Officer.
"Kini nga award usa ka simbolo sa paningkamot sa MDRRMC ug sa padayon nga pagkamalig-on sa sa Las Nieves taliwala sa mga kalamidad," pahayag ni Mayor Rosales.
Iya usab giila ang padayong suporta sa mga barangay ug katawhan sa malampusong kampanya aron magpabiling luwas ang lungsod panahon sa mga kalamidad.
“Ang padayon natong panaghiusa maoy atong kusog aron makab-ot nato ang atong mga handum ug epektibong mapatuman ang mga programa ug proyekto alang sa atong kalamboan,” matud pa sa mayor.
Niadtong 2022, ang Las Nieves giila isip usa sa mga most resilient municipalities sa tibuok Pilipinas.
Napatuman usab sa lokal nga panggamhanan sa milabay nga tuig ang mga programa ug proyekto nga gipondohan ilalum sa 5% Disaster Risk Reduction and Management Fund nga nagseguro sa kaluwasan sa katawhan sa lungsod gikan sa mga kalamidad. (MIO, LGU Las Nieves/PIA Agusan del Norte)
