Serbisyo medikal, dental nadawat sa 2k+ residente sa Carmen
CARMEN, Agusan del Norte -- Laing medical ug dental outreach sa lungsod sa Carmen sa Agusan del Sur ang gipahigayon niadtong Hulyo 6 sa Barangay Poblacion, isip kabahin sa 74th Araw ng Carmen.
Gibana-bana nga kapin sa 2,000 ka mga indibidwal ang nakapahimulos sa maong libreng medikal nga serbisyo sama sa ibot sa ngipon, konsultasyon, ug COVID-19 vaccination. Aduna usab pagpanghatag ug eyeglasses, medisina, wheelchair ug crutches, lakip na ang blood donation.
Gawas sa mga lumolupyo sa Barangay Poblacion, nakapahimulos usab sa mga serbisyo ang pipila ka mga residente sa mga barangay Rojales ug Tagcatong.
Ang maong selebrasyon gitambayayongan sa probinsyal nga panggamhanan sa pagpangulo ni Governor Ma. Angelica Rosedell M. Amante ug Carmen Municipal Mayor Ramon M. Calo.
Miduyog usab sa maong aktibidad sila board members Atty. Ryan Lim ug Francisco Chan, ADN-PPO Provincial Director PCol. Filemon Pacios, 23rd Infantry Battalion Commanding Officer LTC Jeffrey Balingao, Municipal Sangguniang Bayan members, PSWD Officer Dr. Silver Joy Tejano, Red Cross volunteers, ug pipila ka mga empleyado sa kapitolyo ug LGU-Carmen.
Gikataho usab nga aduna na usab sunod ipahigayon mga medical outreach sa mosunod nga mga adlaw sa lungsod gihapon sa Carmen. (Karen Decamotan, PLGU Agusan del Norte/PIA Agusan del Norte)
