CFAG training, gipahigayon sa Las Nieves
Gipasiugdahan ang maong training sa Bureau of Fire Protection (BFP) Las Nieves ubos sa pagdumala ni Municipal Fire Marshal, SFO3 Arniel P. Goloran.
Gitambungan kini sa mga CFAG members gikan sa 10 ka mga barangay sa Las Nieves nga giila nga mga high-risk areas pag-abot sa sunog.
Ang BFP nagtinguha nga mapagpalig-on ang kahibalo ug kahanas sa mga CFAG members mahitungod sa paglikay sa sunog.
“Nagtinguha ta pinaagi aning CFAG training mapalig-on pa ang fire prevention diri sa Las Nieves,” sumala pa ni SFO3 Goloran.
Kabahin sa pagbansay mao ang pagtudlo sa mga CFAG members sa basic fire response pinasubay sa guidelines sa BFP.
Gipasidunggan usab sa BFP ang Municipal Disaster Risk Reduction and Management Council sa lungsod ubos sa pagdumala ni Mayor Karen Rosales tungod sa padayong pagsuporta niini sa mga adbokasiya ug mga programa sa BFP.
“Ang training sa mga CFAG members maoy usa sa atong prayoridad ug pakusgan pa aron kanunay kitang andam panahon sa mga kalamidad sama sa sunog,” matud pa ni Mayor Karen Rosales.
Nanghinaot usab ang mayor nga pinaagi sa maong training, mabansay pa ang mga miembro sa CFAG sa lungsod, mamahimong aktibo ug andam kanunay sa pagresponde sa bisan unsang kahimtang ilabi na sa kabarangayan. (LGU Las Nieves, Agusan del Norte/PIA Agusan del Norte)
