Pagpakusog sa kampanya sa pagpananum ug pagproseso sa AgNor, giplastar sa CDO, TESDA
DAKBAYAN SA BUTUAN -- Giplastar sa Agusan del Norte Congressional District Office (CDO) ni Kongresista Dale B. Corvera ug sa probinsyal nga buhatan sa Techincal Education and Skills Development Authority (TESDA) ang mga pagbansay lambigit sa kampanya pagpapakusog sa pagpananum ug pagproseso sa usa ka meeting.
Mahinumdoman nga gipahiluna sa kongresista nga maka-alokar og P8.5 milyones nga pundo pinaagi sa TESDA-Agusan del Norte, ang labing daku nga alokasyon sa mga distrito sa Mindanao, alang sa maong mga pagbansay.
Sunod sa direksyon sa pagpalambo sa Agusan del Norte ubos sa liderato karon ni Gob. Ma. Angelica Rosedell M. Amante nga mao ang paghimo sa probinsya nga agro-processing center sa Caraga, nakita sa buhatan ni Corvera nga kinahanglan ang suporta diha sa pagbansay sa hustong teknolohiya sa pagpanaum sa priority crops, partikular sa mga commodities nga gipunting nga iproseso sa probinysa ubos sa kampanya sa pagpalambo nga nasugdan tulo ka tuig na karon nga mao ang AGUSAN UP!
Apil usab sa gipalhiluna nga mga pagbansay mao ang heavy equipment operation, carpentry ug pag-atiman sa motorsiklo.
Kapin kon kulang 850 tanan ang gilantaw nga mahimong benepisyaryo ning maong mga pagbansay nga gipunting nga masugdan sa bulan sa Hunyo. (Agusan del Norte 2nd Congressional District Office, hulagway kuha ni John Henry Balansag/PIA Agusan del Norte)
