Magdiwata Festival 2023, gikatakda na
Sa maong mando, gideklara ni Mayor Bravo ang tinuig nga selebrasyon sa Magdiwata Festival sa matag unang semana sa Hunyo sa lungsod sa San Francisco sa lalawigan sa Agusan del Sur.
Ang pagtakda sa unang semana sa Hunyo nga kasaulogan gidesisyonan sa mayor aron paghatag sa hingpit nga suporta sa Naliyagan Festival sa probinsya nga naandan nga gipahigayon kini sa matag Hunyo 12 ngadto sa 17.
Tumong niining mga kasaulogan mao ang pagpahibalo sa mga lumulupyo sa San Francisco nga sila adunay responsibilidad nga panalipdan ug amomahon ang mga makasaysayon, kulturanhon ug kinaiyahan.
Matud pa sa maong mando, ang kapin sa 1,600 ektarya nga Mt. Magdiwata gideklara ni kanhi Presidente Fidel V. Ramos nga Mt. Magdiwata Watershed Forest Reserve pinaagi sa Presidential Proclamation 282 niadtong November 23, 1994.
Dugang pa nga ang bukid Magdiwata usa na ka inilang bisitahan sa mga turista ug mao pod kini ang tinubdan sa tubig ilimnon sa mga lungsoranon gawas pa nagsilbe kining sagang sa higayon nga dunay kusog nga bagyo.
Gihatagan og gimbug-aton sa maong mando nga gimugna ang Magdiwata Festival aron dugang pakabana sa kamahinungdanon sa pagpanlipod sa kinaiyahan ug pagpahinumdum sa mga lungsoranon ang dakong tabang sa ilang mga kinabuhi.
Ang Magdiwata Festival, matud pa ni Mayor Grace, usa ka kasaulogan nga nagpalapnag sa kultura, kabilin ug arte mao nga giawhag ang mga lungsoranon nga aktibo nga makigduyog niini. (MIO San Francisco/PIA-Agusan del Sur)
#ExplainExplainExplain
