Bag-ong pletehan sa trycycle sa Butuan, aprobado na
DAKBAYAN SA BUTUAN -- Aprobado na human gipirmahan ni Mayor Ronnie Vicente Lagnada ang City Ordinance No. 6824-2023 o "Motorized Tricycle-for-hire and Motorela-for-hire fare rates Ordinance” nga ga operate sulod sa territorial jurisdiction sa Butuan City sa pagpangamahanan ni Konsehal Vincent Rizal Rosario uban ang mga Sangguniang Panlungsod members.
Kahinumdumang daghang reklamo ang nadawat sa lokal nga panggamhanan sa Butuan mahitungod na sa pipila ka mga drivers ug operators nga nagpasulabi sa pagtaas sa pletehan sa mga trisikel. Hinungdan nga nagpahigayon ang lokal nga panggamhanan og mga surveys, public consultations ug series sa committee hearings kalabot na sa fix fare rates sa Motorized Tricycle-for-Hire ug Motorela-for-Hire.
Human sa gihimung makuti nga pagtuon, gi disenyo ang balaod-lokal nga mamahimo kining “flexible” sa pag usab sa pletehan ugaling adunay kalit nga pagsaka sa presyo sa gasolina asa dili na kinahanglan modangop sa Sangguniang Panlungsod ang mga tricycle operators ug drivers aron mohangyo sa pag usbaw sa pletehan.
Nakalatid sa Section 2 sa ordinansa nga anaa sa otso pesos ang regular base fare sa unang upat ka kilometro kung presyo sa gasolina anaa lamang sa 45 ngadto 55 pesos. Nuebe pesos kung musaka kini ngadto sa 56 hangtod 65 pesos, dyes pesos kung anaa na sa 66 ngadto 75 pesos ang presyo sa gasolina, onse pesos kung 76 ngadto 85 pesos ang presyo sa gasolina, dose pesos kung 86 ngadto 95 pesos ang presyo sa gas ug trese pesos kung 96 ngadto 105 pesos ang presyo sa gas.
Sa pagkakaron, anaa sa dyes pesos ang pletehan sa mga Motorized Tricycle-for-Hire ug Motorela-for-Hire base na sa presyo sa gasolina.
Samtang 20% ang diskwento sa pletehan sa mga estudyante, senior citizens ug persons with disabilities.
Anaa sab sa ordinansa nga kinahanglang magdisplay og fare matrix ang mga driver nga makita sa mga pasahero.
Apan gipahimangno-an ang mga drayber nga kinahanglan maghulat sa anunsyo sa City Business Permit and Licensing Office (CBPLO) kung angayan na ba tas-an ang pletehan kini subay sa nakalatid sa Section 3 sa nasangpit nga ordinansa.
Katuyuan niini nga malikayan ang dili otorisado nga pagpataas sa mga pletehan ug pag abuso ugaling adunay pagsaka sa presyo sa gasolina nga mahitabo.
Base usab sa maong ordinansa adunay penalty nga ipahamtang kung adunay pag abuso o kalapasan supak sa gitakda nga pletehan. (Butan City PIO/PIA Agusan del Norte)
