Thursday, April 13, 2023

Hingpit nang gibawal ang pagsunog og basura sa Magallanes

DAKBAYAN SA BUTUAN -- Hingpit nang gibawal ang pagsunog sa gawas og mga bisan unsang klase nga mga basura sulod sa teritoryo sa lungsod sa Magallanes, Agusan del Norte ubos sa mando sa Municipal Ordinance No.005-2022. 

Kinsa kadtong makalapas sa balaod pahamtangan og mga silot sa mosunod: 1st offense P500, 2nd offense P700, ug 3rd offense P1,000.

Gidiklarang balido sa Sangguniang Panlalawigan ang maong Municipal Ordinance No. 003-2023 nga gikan sa Sangguniang Bayan sa Magallanes.

Girekomendar sa Committee on Environment and Natural Resources nga gipangunahan ni Bokal Rodulfo A. Pitogo nga mapalabang ang maong ordinansa.

Ang nasangpit nga ordinansa sa munisipyo nagtinguha sa pagpalambu sa panglawas sa publiko, pagpanalipod sa kinaiyahan ug duyog sa kinaiyahan sa maayong pamaagi aron madasig ang pagpreserba ug pagrekober sa mga kahinguhaan.

Ang maong lakang gipalabang pinaagi sa Sanggunian Resolution No. 168-2023 atol sa ika 33rd regular session sa Sangguniang Panlalawigan kaniadtong Marso 28, 2023. (Ramil L. Pasco, PLGU Agusan del Norte/PIA Agusan del Norte)