Mga residente sa Barangay Mandamo, gikalipay ang kalambuan sa imprastraktura sa barangay
DAKBAYAN SA BUTUAN -- Dakung pasalamat ug kalipay sa mga residente sa Barangay Mandamo ning syudad ang naangkon nga kalambuan sa imprastraktura asa halos sementado na ang tanang dalan sa barangay.
Kini usa sa ligasiya sa syudad sa Butuan ang pagpasemento sa mga rural barangay tungod dinhi nagsumikad ang paglambo sa ekonomiya ug suplay sa pagkaon.
Kahinumdumang tuig 2018, usa sa nabisitahan ni Mayor Ronnie Vicente Lagnada ang Barangay Mandamo. Nakahigayon si Punong Barangay Jose Cataluňa Jr. nga ipakita sa mayor ang Barangay Development Plan ug nakita niini ang dakung importansya sa maayong dalan tungod ang barangay dunay dakung area ug produksyon sa mais, homay, lubi ug uban pa.
Napatuman ang mga proyektong road concreting sa barangay nga gipunduhan sa national government pinaagi sa Department of Public Works and Highways. Ang kaniadtong batuhon ug lapokon nga mga dalan, hayahay ug nindot na agihan sa tanan ilabina sa mga magtutungha, riding public ug mag-uuma.
Sa kasamtangan nagpadayon ang road concreting projects ilawom sa programang Improvement of Various Rural Roads sa Butuan City sa pagpatuman sa City Engineers Office. Kini homan gi-aprobahan sa Sanguniang Panlungsod pinaagi sa supplemental infrastructure projects alang sa rural barangay nga anaa na sa 75 porsyento ang dagan sa konstruksyon sa kinatibuk-ang proyekto.
Tungod niini, gilaumang modagsa ang mga negosyante nga mobubo og negosyo sa dapit aron makahatag og panginabuhian sa tanan ug sayon na sa mga mag-uuma ang pagpakanaug sa agrikulturang produkto paingon sa merkado.
Karon garbo ug dakong kalipay sa tanang residente ilabina sa mga opisyales sa barangay ang naangkon nga dakong kalambuan. (Butuan City PIO/PIA Agusan del Norte)
