Kaayuhan sa “Buy Local, Go Local" gipasigarbo sa DTI-AgSur
PROSPERIDAD, Agusan del Sur – Sa pakighinabi sa personahe gikan sa Phiilippine Information Agency (PIA) Agusan del Sur Information Center ngadto kay Provincial Director Jose Baron, Jr. sa Department of Trade and Industry (DTI) Agusan del Sur, inubanan ni Cerila Inson, Senior Trade and Industry Development Specialist, ug Ferdinand Inres, Trade and Industry Development Specialist ug kasamtangang Information Officer, gipasigarbo sa mga opisyal ang kaayuhan ug benepisyo ngadto sa mga local entrepreneurs kabahin sa implementasyon sa “Buy Local, Go Local” Campaign.
Gipahayag ni PD Baron nga ang tumong sa “Buy Local, Go Local” campaign sa DTI mao ang pag promote ug pag patronize sa mga lokal nga produkto sa probinsya sa Agusan del Sur. Tungod sa mga nagkadaiyang trade fairs nga gilunsad sa DTI, mitaas ang profit percentage sa mga local entrepreneurs sa probinsya.
"Diri sa atong probinsya aduna nay ubay-ubay nga lungsod ang naga patoman sa atong "Buy Local, Go Local" campaign, diin sa pagka karon, usa pa lamang ka lungsod ang adunay ordinansa niini mao ang lungsod sa San Luis, ug adunay duha ka Executive Order usab sa lungsod sa Sibagat ug Bunawan, samtang padayon pa ang pagmugna sa resolusyon nga gipasaka sa buhatan sa Sangguniang Bayan sa lungsod sa San Francisco. Ang ubang lungsod sa probinsya padayon pang naga hisgut sa maong campaign sa DTI Agusan del Sur," dugang ni Baron.
Nasayran nga giorganisa usab sa DTI Agusan del Sur ang Integrated Producers Association of Prosperidad Agusan del Su, Inc. (IPAPADSI) nga diin mao kini ang grupo sa mga local producers sa probinsya ug lakip na niini ang mga Micro, Small and Medium Enterprises (MSMEs) sa probinsya. Ang mga produkto nga gipamaligya naga gikan gayud sa mga materyales sa Agusan del Sur. Aduna usab gi mugna ang DTI Agusan del Sur nga "One Town, One Product" (OTOP) nga gi dumalaan sa IPAPADSI diin makita ngadto sa Negosyo Center sa lungsod sa San Francisco.
"Padayon gayud nga naga suporta ang DTI Agusan del Sur sa mga katawhan para sa ilang mga panginabuhian inubanan sa nagkada-iyang ahensya sa gobyerno para ma promote gayud ang mga produkto sa katawhan dri sa atong probinsya. Dugang paman niini, daghay mga programa ang gobyerno nga giulohan sa DTI diin para mapalambo pa ug maayo ang mga negosyo sa mga gagmay hangtud ngadto sa dagkong negosyante," sigun ni Baron.
Nahisgutan usab sa maong panag pulong ang mahitungod sa Coconut Farmers and Industry Development Plan (CFIDP) ug ang Republic Act 11524 also known as the Coconut Farmers and Industry Trust Fund (CFITF) Act.
"Tungod niini nga balaod, madungagan ang produksyon ug kita sa mga mag-uuma sa lubi, pag haw-as sa kalisod, edukasyon, ug katalingbanong kaangayan. Lakip nasab niini ang rehabilitasyon ug modernisasyon sa industriya sa lubi ngadto sa produksyon sa uma," sumala ni Baron.
"Ang CFITF kinahanglang magpabilin sulod sa 50 katuig ug alang sa kaayuhan sa mga mag-uuma sa lubi ug sa kalambuansa industria," dugang pa sa provincial director.
Sa ngalan sa Serbisyo Publiko, ang DTI Agusan del Sur inubanan sa mga nagkada-iyang partner agencies ug stakeholders, magapadayon gayod sa pagsuporta sa mga local producers sa probinsya sa Agusan del Sur aron sa pag palambo sa mga panginabuhian sa mga katawhan. (JPG/KED/PIA-Agusan del Sur)
