(PAGASA 24-HOUR PUBLIC WEATHER FORECAST as of Monday, 04 March 2024) Northeast Monsoon affecting Luzon. Butuan City, Agusan del Norte, Agusan del Sur, Dinagat Islands, Surigao del Norte and Surigao del Sur, will experience partly cloudy to cloudy skies with isolated rainshowers or thunderstorms due to Easterlies/Localized Thunderstorms. Possible flash floods or landslides during severe thunderstorms. Moderate to strong winds coming from Northeast to East will prevail with moderate to rough seas (1.2 to 2.8 meters).


Monday, March 13, 2023

Ikaduhang hugna sa AguSerbisyo Carvan, nagmalampuson

DAKBAYAN SA BUTUAN -- Malampusong natigayon ang ikaduhang hugna sa Aguserbisyo Caravan nga gipahigayon kaniadtong Marso 3, 2023, didto sa Barangay Lawigan sa lungsod sa Tubay.

Agig pagtuman sa saad ni Gobernador Angel Amante, ang Barangay Lawigan maoy ikaduha nga Coastal Barangay sa maong lungsod nga nakatagamtam sa libreng serbisyo nga gitunol sa Panggamhanang Probinsiyal, Munisipal,, apil ang Buhatan sa ika-duhang Distrito nga gipangunahan ni Kongresista Dale Corvera ug sa mga nagkadaiyang Line Agencies.

Ug sumala sa gihimong caravan kaniadtong miaging bulan didto sa Tinigbasan, susama gihapon nga mge serbisyo ang natagamtaman sa halos tanang residente sama sa libreng pagkonsulta, pagtambal sa mga komon nga balatian sama sa hilanat, ubo, sip-on, ibot sa ngipon, libreng tuli, libreng hilot kun masahe, ug uban pa, pagtunol ug school supplies sa mga kabataan, libreng tupi, legal services, first aid demonstration, ug daghan pang uban.   

Kahinumduman, matod pa sa testimonya ug pagpasalamat ni Mayor Jimmy Beray, nga karon pa lang gyod nahitabo sa ilang Munisipyo nga nahiusa ang tanang mga serbisyo sa pang-gobierno dili lamang sa medikal apan lakip na ang mga economic services nga gipadangat ubos sa liderato ni Gobernador Ma. Angelica Rosedell M. Amante ug sa kongresista, uban usab ang uban nga mga ahensiya sa kagamhanan.

Dakong kalipay ug pagpasalamat ang nasinati sa mga residente sa Barangay Lawigan tungod kay abi nila didto ra kutob sa Tinigbasan ang gitunol nga serbisyo sa miaging bulan tungod kay lisod man adtoon ang ilang dapit, apan wala gyod gipakyas sa gobernador ang iyang saad nga tanan coastal barangays apuron gayod sa libreng serbisyo nga itunol ngadto kanila.

Alang sa kasayranan sa tanan, ang AguSerbisyo Caravan ning lalawigan usa ka immersion nga kalihokan kansang tumong mao ang paghiusa sa tanang social ug economic development services alang sa gitumbok nga mga hilit nga dapit ning lalawigan gikan sa Probinsyal nga Panggamhanan, Congressional District Office sa Agusan del Norte, Lokal nga Panggamhanan kaabag ang mga nagkalain-laing ahensya, kapulisan ug kasundalohan sa Agusan del Norte. Ug gisugdan kini sa panahon ni kanhi gobernador  pa si Corvera nga karon kongresista na ug kasamtamang gipadayon ni  Amante.

Kabahin sa mensahe sa Gobernador, mopadayon pa ang Probinsyal nga Panggamhanan sa sunod nga semana ning bulan sa Marso ngadto sa lain pang mga Barangays sama sa Lawigan, Tagpangahoy, Binuangan ug balik sa Tinigbasan dala gihapon ang nahisgutang mga serbisyo.

Sa makanunayon, si  Beray nagpaabot sa iyang dako nga pasalamat sa tanang mihimo sa ilang sakripisyo aron lang makatagamtam ang mga katawhang Tubaynon sa talagsaong serbisyo. (Edgar Palarca, hulagway kuha ni Reuben Don Sanchez, PLGU Agusan del Norte/PIA Agusan del Norte)