Friday, March 17, 2023

DA Caraga, LGU Butuan nagtambayayong nga ipatuman ang Hybrid Rice Techno Demo

DAKBAYAN SA BUTUAN -- Mokabat unom ka gatus ektaryas nga kahumayan sa Dakbayan sa Butuan ang laraw nga isukip sa i-establisar nga Technology Demonstration o techno demo sa hybrid nga humay.

Nagtambayayong ang Department of Agriculture-Caraga Rice Program ug Agricultural Program Coordinating Office o APCO Agusan del Norte kauban ang City Agriculture Office sa Butuan sa pagpahigayon ug validation sa mga target beneficiaries sa gisugyot nga luna alang sa maong techno demo. 

Tipik ug kabahin ang maong proyekto sa mga nakahan-ay alang sa tuig 2023 nga mga kalihukan ilawom sa DA-Rice Program.

Ang mag-uuma nga mahimong kabahin sa proyekto suportahan pinaagi sa binhi ug abono. 

Kini ipatuman karong ikaduhang cropping niining tuiga diin ipakita ang nagkadaiyang barayti sa hybrid nga humay. Pinaagi niini, masuta ang mga barayti nga mas haum sa usa ka dapit ug mahimong basihan sa mga mag-uuma sa barayti nga ilang itanum. 

Mosumada sa siyam ka barangay sa Dakbayan sa Butuan ang na-validate na sa miaging Marso 7 hangtod 10, 2023 partikularminte sa Florida, Maguinda, Aupagan, Tagabaca, Baan, Lemon, Pigdaulan, San Mateo ug Dulag alang sa maong katuyoan. (DA Caraga/PIA Agusan del Norte)