Thursday, January 19, 2023

Code of General Ordinances sa Butuan City, aprobado na sa 3^rd ug final reading sa SP session

DAKBAYAN SA BUTUAN -- Aprobado na sa third ug final reading ang giduso ni City Councilor Cromwell Nortega nga SP Ordinance no. 16-185-2022 o ang Code of General Ordinances sa syudad sa Butuan atol sa natigayong 25th Regular Session sa mga miyembro sa Sangguniang Panlungsod sa pagpanguna ni Vice Mayor Law Fortun, miaging semana.

Ang Codes of General Ordinances usa sa 16 local codes o RACE 16:16 nga gihingusgan ug prayoridad sa 16th Sangguniang Panglungsod  ga mapatuman subay sa komprehensibong mga balaodnon alang sa kaayuhan sa kinatibuk-ang syudad sa Butuan.

Gitutukan sa codes of general ordinances ang pag organisa ug pagkolekta sa mga kasamtangang ordinansa sa syudad aron makasigurong haum sa panginahanglanon sa katawhan. Gilantaw sab niini ang lig-on nga monitoring ug malahutayong pagpatuman sa mga balaudnon. Gipaniguro usab niini nga malikayan ang unsa mang komplikasyon ug pagkasumpaki nga may kalambigitan sa hisgutanang legal.

Tungod niini gipasidunggan ug gipasalamatan ni City Councilor Nortega  si Vice Mayor Fortun sa paningkamot niining masugdan ug mamugna ang nasangpit nga balaodnon asa usa sa prayoridad sa unang termino niini sa iyang pagbalik isip bise mayor sa syudad.

Samtang mipaabot usab sa dakong pasalamat si Vice Mayor Fortun sa tanang nagpaluyo aron mahatagan sa katumanang makabaton ang syudad sa Butuan sa Code of General Ordinances. (Butuan City PIO/PIA Agusan del Norte)