Tolo ka organisasyon unang na-akredit sa bag-ong tuig
DAKBAYAN SA BUTUAN -- Gihatagan og akreditasyon sa Sangguniang Panlalawigan sa Agusan del Norte ang 3 ka organisasyon ning probinsya agig pag-ila sa ilang dakong papel sa kalambuan sa katilingban sa unang bulan sa tuig 2023.
Ang nahatagan sa maong akreditasyon mao ang Maraiging Mamanwa Farmers Skiled Workers Association (MAMAFASWAS) sa lungsod sa Jabonga, Abante E.G. Montilla Ambacon Rice Cluster Farmers Association Inc. sa Barangay Montilla, Las Nieves, ug Kooperatiba sa Katawhan sa Mahaba Para sa Kalambuan (KKMPK) sa Cabadbaran City, ning lalawigan.
Ubos sa Section 34 sa Local Government Code of 1991 kun R.A. 7160, gimando ang pagtukod og Peoples Organizations, Non-Government Organizations, ug mga pribadong sektor isip aktibong partner sa mga lokal nga panggamhanan sa atong nasod padulong sa dugang kalambuan.
Ang paghatag sa ilang akreditasyon gipaagi sa Sanggunian Resolution Nos. 002-2023 ug 003-2023 sa rekomendasyon sa Committee on Cooperative and Community Organization diin tsirman si Bokal Francisco Y. Chan, Jr. atol sa ika 23rd Regular Session kaniadtong Enero 10, 2023. (Ramil L. Pasco, PLGU Agusan del Norte/PIA Agusan del Norte)
