Mga living spacers sa Agusan del Norte, nakadawat ug pahalipay gikan kang Gob. Angel Amante
DAKBAYAN SA BUTUAN -- Mokabat sa gibana-bana nga 155 ka mga living spacers sa Agusan del Norte Provincial Jail ang nakadawat ug pahalipay kaniadtong Myerkules, gikan kang Provincial Governor Ma. Angelica Rosedell M. Amante, sa natigayong Living Spacers (LS) Year-End Assessment didto sa Provincial Jail, Libertad, ning dakbayan sa Butuan.
Gipangulohan kini mismo ni Gobernador Angel Amante uban ni Agusan del Norte Provincial Jail Warden Fermin Antenorio, Jabonga Municipal Administrator Ruth Jugao ug uban pa.
Atol sa maong aktibidad, gi-butyag ni Gob. Amante nga makadawat ug tag Php1,000 ang matag usa ka living spacer sa probinsya isip regalo sa Gobernador alang kanila ug sa ilang pamilya panahon nga mobisita na kini sa ilaha sa adlaw’ng kapaskohan.
Daku usab ang kalipay ni Gob. Amante sa paglaom nga gipakita sa mga inmates taliwala sa sitwasyon nga ilang gi-atubang karon.
“In life, there are always second chances. Dili gyud ta mawad-an ug paglaum. I always believe nga there will always be a tomorrow for all of us” pagdasig nga mensahe ni Gob. Amante.
Gawas sa salapi, mohatag usab ang
gobernador ug pagkaon isip mahimo nilang salo-salo panahon sa pasko.
Daku usab ang pagpasalamat sa mga piniriso sa ilang nadawat gikan kang Gob. Amante.
Matod pa ni Warden Antenorio, daku na
kini nga tabang sa mga living spacers. Wala usab puas iyang pagpasalamat kay
Gob. Amante tungod kay walay pakyas ang iyang pagpanghatag ug pahalipay sa
maong grupo.
Agi ug pagpasalamat sa Gobernador, nag-presenta usab ang mga wardens ug inmates ug mga nagkadaiyang presentasyon matag usa. (Karen Decamotan, hulagway kuha ni RFA, LGU Agusan del Norte/PIA Agusan del Norte)
