Mga proyekto pangkalambuan, gihisgutan sa LGU Las Nieves ug ni Kongresista Corvera
DAKBAYAN SA BUTUAN -- Mibisita sa buhatan ni Kongresista Dale B. Corvera sa kaniadtong Biyernes ang mga opisyal sa Sangguniang Bayan sa Las Nieves, Agusan del Norte sa pagpanguna ni Bise Mayor Virgilio Escasenas Jr. aron hisgutan ang posibleng mga kalihukan pangkalambuan nga posibleng buligan pagapahiluna.
Usa sa mga nahisgutan mao ang kabahin sa Eco-Tourism Zone nga ipahiluna ni Kongresista Corvera pinaagi sa usa ka balaudnon. Follow through kini sa Poblacion, Buenavista – Bocbocon, Las Nieves Tourist Lane Development nga gipahiluna sa kongresista sa gobernador pa siya sa miaging termino.
Buot usab makigtambayong ang mga opisyal sa Las Nieves sa buhatan ni Kongresista Corvera sa pagpahiluna sa “Riverine Tourist Lane” agi sa rota sa Agusan River gikan sa Magallanes ngadto sa Las Nieves.
Apil usab sa gilantaw sa mga opisyal sa Las Nieves mao ang pagpahiluna og koliheyo, bisan kung extension lang usa, sa Las Nieves.
Nagpasalamat usab sila VM Escasenas sa maong pagbisita sa pagbarug ni Kongresista Corvera alang sa daku-daku nga budget alang sa proyektong tulay gikan sa Las Nieves tabok sa Butuan.
Mahinumdoman nga mibarug si kongresista sa hawanan sa kongreso aron ipabati sa kadagkuan sa Department of Public Works and Highways (DPWH) ang gamay kaayo nga Php10-Php50 milyones nga budget matag tuig ning maong proyekto nga nagkinahanglan og bilyong kantidad. Molungtad og taas nga katuigan mao pa mahuman kining maong tulay nga daku kaayo ang matampo pagpalambo sa lapad nga kayutaan sa lugar kung mao ra kagamay ang budget niini matag tuig, sumala pa ni Kongresista Corvera. (Agusan del Norte 2nd Congressional District Office/PIA Agusan del Norte)
