RTR sa AgNor, nagsugod na pagpatrabaho sa 2nd batch sa TUPAD
DAKBAYAN SA BUTUAN -- Nagsugod kaniadtong Huwebes, pinaagi sa usa ka orientation ang lungsod sa RTR, Agusan del Norte pagpatrabaho sa 41 ka residente gamit ang pundo sa Tulong Panghanapbuhay sa Ating Disadvantaged/Displaced Workers (TUPAD) nga gigahin sa distrito ni Kongresista Dale B. Corvera.
Ang TUPAD programa nga gidumala sa Department of Labor and Employment. Ubos sa programa makatrabaho ang usa ka indigent displaced worker sa sweldo nga Php350 ang adlaw sulod sa 15 ka adlaw.
Ang 41 ka displaced workers sa RTR nga apil ning maong batch, dugang sa 35 nga nakatrabaho sa unang batch sugod sa miaging bulan.
Alang sa masukod nga resulta sa productivity sa matag motrabaho unya, gipahiluna sa buhatan ni Kongresista Corvera ug ni Mayor Richard Daquipil nga diha sa pagtanum og abaca sa mahiusahang luna i-sentro ang trabaho. Mitampo ang Philippine Fiber Development Authority og mga semilya sa abaca alang niini.
Mosuma sa 850 ka displaced workers ang makatrabaho sa tibuok segundo distrito sa Agusan del Norte ning second batch, dugang sa 510 nga nakatrabaho sa unang batch sugod niadtong bulan sa Agosto.
Aron makatampo sa kinatibuk-ang sustenidong economic productivity, gisugyot sa buhatan ni Kongresista Corvera nga ang trabaho mahimong i-sentro pagtanum o pagpalambo sa value chain sa commodities diin abunda ang usa ka lungsod. (Hulagway ni Jenny Fabia, Agusan del Norte 2nd Congressional Office/PIA Agusan del Norte)
