IP Assistance Desk sa Agusan del Norte, gipahiluna
DAKBAYAN SA BUTUAN -- Giaprobahan bag-ohay pa lamang sa Sangguniang Panlalawigan ang pag-amendar sa Provincial Ordinance No. 601-2021 o ang IP Code alang sa epektibong pag-establisar og Indigenous Peoples (IP) Assistance Desk sa tanang police precincts/stations, public hospitals, rural health centers, municipal halls ug uban pang government centers ug buhatan sa probinsya sa Agusan del Norte.
Ang Provincial Ordinance No. 630-2022 nga nag-amendar sa Item 5, Sub-items A, B, ug C, Section 44 sa nasangpit sa taas nga ordinansa gipangamahanan ni Hon. Randy P. Catarman, ang Provincial Indigenous Peoples Mandatory Representative (IPMR) sa probinsya sa Agusan del Norte.
Gi-pirmahan kini ni Provincial Governor Ma. Angelica Rosedell M. Amante niadtong Septyembre 16, 2022.
Ang pinaka-importante nga unod niini nga ordinansa mao ang paghatag og kahigayonan sa mas dali nga serbisyo alang sa mga IPs sa probinsya pinaagi sa pagbutang o paghatag og usa ka lingkuranan alang sa usa ka IPs nga gitawag og "IPs Assistance Desk" sa nagkalain-lain nga buhatan sa probinsya nga duolan sa mga IPs sa panahon nga aduna silay mga katuyoan ug mga kinahanglan sa maong mga ahensya sa gobyerno.
Dako ang pasalamat sa buhatan sa Provincial IPMR-Agusan del Norte ngadto sa liderato sa lokal nga panggamhanan sa probinsya sa panguna ni Gov. Amante, Vice Governor Enrico R. Corvera, ug sa tanang myembro sa Sangguniang Panlalawigan sa walay hunong nga suporta sa tribung komunidad sa tibook probinsya pinaagi sa Provincial IPMR Office.
Nagpasalamat usab sila sa dakong
suporta nga gihatag sa buhatan sa National Commission on Indigenous Peoples
(NCIP)-Agusan del Norte sa pagpanguna ni Engr. Cierona Cutar-Molaan, Acting
Provincial Officer hinungdan nga malampuson nga naduso ug naaprobahan ang maong
provincial ordinance sa pagpaningkamot ni IMPR Catarman. (AgNor Bulletin/PIA
Agusan del Norte)
