AgNor tinguha nga makabaton og youth trainer matag lungsod
DAKBAYAN SA BUTUAN -- Aron mas mapalapdan pa ang serbisyo ug ma-reach out pa ang mga kabatan-onan, nagpahigayon ang probinsyal nga panggamhanan sa Agusan del Norte og Training of Trainers’ (TOT) mahitungod sa Peer Education and Peer Helping ubos sa Adolescent Health and Development Program (AHDP) sa Cabadbaran City.
Tumong sa maong kalihukan nga maka-baton og mga youth trainer sa matag lungsod ug syudad sa tibuok probinsya sa Agusan del Norte aron matabangan nga mapahiluna ang panginahanglanon sa mga kabatan-onan mahitungod sa ilang personal issues ug concerns isip usa ka batan-on ug makahatag og sakto nga impormasyon sa sayop nga pagsabot mahitungod niini.
Dugang niini, tinguha usab sa maong kalihukan nga mapasayon ra ang pag-access sa mga kabatan-onan sa mga serbisyo ngadto sa tagsa-tagsa nila ka lungsod.
Gibansay ang matag Youth Representative, Sangguniang Kabataan Officers ug AHD Program Coordinator kada lungsod mahitungod sa: 1) Orientation on Youth Peer Education, 2) Changing Bodies, Changing Selves, 3) Sex, Gender, and Human Sexuality, 4) Teen’s Sexuality & Reproductive Health Concerns, 5) Peer Helping ug ang 6) Organizing & Designing a Youth Peer Education Session.
Ang kompleto nga pagbansay nagtugot sa mga partisipante nga makagradwar isip mga magtutudlo ug facilitator sa ilang mga kaedad.
Ang nasangpit nga kalihukan gipangunahan sa buhatan sa Provincial Social Welfare and Development (PSWD) pinaagi sa Provincial Population and Development Program uban sa pakigtambayayong sa ReachHealth Caraga ug DepEd-Agusan del Norte pinaagi sa programa sa Youth Optimizing Life Opportunities kun YOLO.
Misalmot sa maong aktibidad si Board Member Keefe Blue R. Leonar, Chairperson sa Committee on Youth ug SK Provincial Federation President, PSWD Officer Silver Joy Tejano, Provincial Population Focal Person Alfie Semonette Pabillore ug ang mga Resource Speakers. (KKD, LGU Agusan del Norte/PIA Agusan del Norte)
