AgNor, DAR ug DPWH mosulod og kasabutan alang sa double-lane bridge sa Matabao
DAKBAYAN SA BUTUAN -- Usa ka kasabutan ang gitakdang pirmahan tali sa probinsya, Department of Agrarian Reform (DAR) ug Department of Public Works & Highways (DPWH) human giaprobahan kini sa 19th Sangguniang Panlalawigan niadtong adlawng Martes, Hulyo 19 nga magtukod sa tulay sa Barangay Matabao, Buenavista.
Pinaagi sa Sanggunian Resolution No. 005-2022 aduna nay otoridad si Gob. Angel Amante aron sa pagpirma sa memorandum of agreement tali sa probinsya, DAR, ug Bridges Management Cluster-Unified Project Management Office (BMC-UPMO) ubos sa DPWH alang sa proyektong double-lane Buenavista-Matabao Bridge nga nagsukod og 28.80 linear meters ubos sa programang Tulay ng Pangulo Para sa Kaunlarang Pang-Agraryo (TPKP) sa DAR.
Nasayran nga resulta kini nga proyekto sa hangyo sa probinsya ngadto sa DAR aron mas molambo pa ang kahimtang sa matag komunidad ning probinsya subay sa mandato sa buhatan nga matubag ang panginahanglan sa 3 ka milyon nga agrarian reform beneficiaries sa kapin 2 milyon nga agrarian reform communities sa tibook nasod ubos sa RA 6657 kun Comprehensive Agrarian Reform Law ug RA 9700 kun Comprehensive Agrarian Reform Program Extension with Reform (CARPER).
Giklaro sa maong kasabutan nga ang pundo maggikan sa nasangpit nga mga ahensya samtang counterpart sa probinsya ang galastuson alang sa road-right-of-way.
Ang SR 005-2022 gipangamahanan ni Bokal Dick Victor B. Carmona ug giaprobahan sa pinakaunang regular nga sesyon sa 19th SP. (JVDemain, LGU Agusan del Norte/PIA Agusand el Norte)
