Sobra gatus ka indibidwal sa usa ka Barangay sa Butuan, nahimong myembro sa Hypertensive ug Diabetic Health Club
DAKBAYAN SA BUTUAN -- Niabot sa 131 ka indibidwal ang nadugang nga miyembro sa Hypertensive and Diabetic Health Club sa Butuan City Health Office kon CHO. Ang nasangpit nga club gimugna sa CHO tungod sa nagkataas nga kaso sa mga indibidwal nga adunay hypertension ug diabetes. Gawas sa check-up, nakabaton usab ang mga indibidwal og libreng tambal.
Nag-awhag usab ang CHO og laboratory services sama sa urinalysis, fasting blood sugar, blood uric acid ug total blood cholesterol. Lakip usab gihatag sa ila ang dental services nga oral advocacy and care.
Usa ang hypertension sa nag-unang sakit nga magdala og komplikasyon sa diabetes, sama sa diabetic eye disease ug kidney disease. Kasagaran sa adunay diabetes, kadugayan nag resulta og high blood pressure, ug uban pang heart ug circulation problems.
Nahimo usab nga guest speaker si Dr. Renato Jose Villanueva aron mahibaluan sa mga indibidwal ang mga angay nilang buhaton ug malikay na sila sa mga risgo nga dala sa ilang sakit.
Prayoridad ni Butuan City Mayor Ronnie Vicente Lagnada nga tagaan
og pagtagad ang mga indibidwal hilabi na ang mga Senior Citizen nga adunay
sakit nga hypertension ug diabetes aron kanunay nga ma-check ug mahatagan og
tambal. (Butuan City PIO/PIA Agusan del Norte)
