IPs sa Barangay Manila de Bugabos, nakabenepisyo sa libreng Serbisyo nga gitanyag sa LGU Butuan
DAKBAYAN SA BUTUAN -- Gidala sa local government unit (LGU) Butuan ang mga serbisyo sa mga nagkadaiyang opisina alang sa mga residente sa Barangay Manila de Bugabus sa gipahigayong Community Outreach.
Nahatagan sa libreng serbisyo sa Lokal nga Panggamhanan pinaagi sa Office of the Indigenous Peoples, Culture, Heritage and Arts, katambayayong ang ubang buhatan ug ahensya sa gobyerno, ang mga Indigenous People kon IPs sa Barangay Manila de Bugabus.
Suportado ni Konsehal Cromwell Nortega ang sama niini nga mga kalihukan sa Lokal nga Panggamhanan asa personal niya nga gibisita ang mga IP members sa mga barangay aron madungog ug mahatag ang mga gikinahanglan sa ilang lugar. Padayon ang paghatag ni Butuan City Mayor Ronnie Vicente Lagnada uban sa Sangguniang Panlungsod og suporta sa mga kaigsoonang IP sa syudad sa Butuan.
Daghan nga mga opisina ang misanong sa community outreach aron magmalampuson ang mga serbisyo nga angay sa mga IPs. Anaa ang 4th Scout Ranger Battalion, TESDA-Caraga, PhilHealth nga katambayayong nga ahensya sa Lokal nga Panggamhanan.
Anaa usab ang mga opisina sa LGU-Butuan sama sa City ENRO, CSWD, OSCA, BCMTC, City Legal Office, City Civil Registrar, City Vet, City Health Office, Butuan Medical Center, City Agri, City Coop, CTIIPO, ug City Accounting.
Daghan sa mga IPs ang nagpa late registration sa City Civil Registrar ug lakip na usab ang libreng notaryo hatud sa City Legal Office. Ang City ENRO usab nanghatag og binhi sa mangosteen ug durian. Ang City Agriculture usab naghatag og mga binhi para sa backyard gardening. Lakip usab naghatag og libreng tupi ang BCMTC sa mga kabataan sa lugar. Ang City COOP ug CTIIPO nagtanyag og libreng kahibaluan kalabot sa kahugpungan sa lugar nga adunay mga negosyo o kooperatiba.
Ang partner agency usab sa LGU-Butuan sama sa TESDA-Caraga, nga nagtanyag og mga pagbansay nga pwede kuhaon para sa skills training sa usa ka indibidwal ug PhilHealth nga naghatag og assistance kalabot na sa mga pangutana sa ilang ahensya. (Butuan city PIO/LGU Agusan del Norte)
