Personahe sa Plant! Plant! Plant! gibansay sa PHILFIDA pagbansay sa pagdumala og nursery sa abaka
DAKBAYAN SA BUTUAN -- Miagi ang siyam ka personahe sa proyektong Plant! Plant! Plant! sa AGUSAN UP! og duha ka adlaw nga pagpbansay pagdumala og nursery sa abaca.
Tumong sa maong pagbansay nga mahimong andam ang mga personahe sa nursery sa Plant! Plant! Plant! sa pagpadagan sa gipahiluna nila karon nga nursery sa abaka.
Ang probinsyal nga panggamhanan, pinaagi sa AGUSAN UP!, nagpunting nga makatanum og abaka sa 4,000 ektaryas nga luna pag-abot sa tuig 2027. Niini magtanum kini sa 667 ektaryas nga luna matag tuig sa mosunod nga unom ka tuig. Sa tag 1,100 ka kinahanglang semilya matag ektarya, kinahanglan maka-produce kini og 733,333 ka semilya sa abaka matag tuig.
Ang abaca usa lamang sa mga high value crops nga pakusgan sa probinsya ang pagpananum hangtud sa tuig 2027. Nag-apil kini og walo ka lain pang commodities nga itanum sa mosuma sa 125,000 ektaryas. Ang ubang mga commodities mao ang saging, bulanghoy, kape, cacao, rubber, commercial trees ingon man mangga ug uban pang prutas.
Aron maka-produce sa mga seedlings sa maong crops, nagpahiluna ang probinsya karon og tulo ka nurseries nga naay area nga mosuma sa kapin sa lima ka ektarya.
Ang pagpananum sa mga mga crops kabahin sa flagship program sa AGUSAN UP! nga Plant and Process for Prosperity. Magsilbing kaluhang proyekto dinhi sa Plant! Plant! Plant! ang Process! Process! Process! Ang abot sa mga uma gipunting dinhi nga iproseso ra usab sa mga processing companies nga ipahiluna sa probinsya mismo, panukaran pagkab-ot sa panglantaw niini nga mahimong “Agri-Processing Center sa Caraga” pag-abot sa tuig 2027.
Ang AGUSAN UP! mao ang kampanya sa pagpalambo sa administrasyon ni Gob. Dale B. Corvera kaabag ang buhatan ni Kong. Angel Amante-Matba. (AGUSAN UP! Nursery Team, LGU-Agusan del Norte/PIA-Agusan del Norte)
