(PAGASA 24-HOUR PUBLIC WEATHER FORECAST as of Wednesday, 27 March 2024) Easterlies affecting the eastern section of the country. Butuan City, Agusan del Norte, Agusan del Sur, Dinagat Islands, Surigao del Norte and Surigao del Sur will experience Partly cloudy to cloudy skies with isolated rainshowers or thunderstorms due to Easterlies / Localized Thunderstorms. Possible flash floods or landslides during severe thunderstorms.


Thursday, March 31, 2022

Health care sa Basilisa, gipakusog pa pinaagi sa pag-abri sa bag-ong health facility 

SAN JOSE, Dinagat Islands -- Pormal nga giabrihan sa publiko pinaagi sa Department of Health (DOH) ug Provincial Government sa pagpanguna ni Governor Arlene "Kaka" Bag-ao, ang bag-ong health facility sa Barangay Doña Helene, Basilisa, aning probinsya. 

Kini nga pasilidad mao ang orihinal nga na-conceptualize niadtong 2014 pinaagi sa mga diskusyon ni Gov. Kaka niadtong siya pa ang Kongresista sa Dinagat Islands, DOH, ug Department of Public Works and Highways (DPWH).

Gisugdan ang construction sa pasilidad niadtong 2015 nga mamahimo untanang fully-functioning hospital alang sa tanang Dinagatnon, kadungan sa mamahimong Mother and Child Specialty Hospital nga annex untana sa Caraga Regional Hospital, tungod kay nakita ni Gov. Kaka nga ang pinakalimit nga nasinati sa pagkapatay sa Dinagat Islands mao ang mga sakit ug kumplikasyong nasinati sa mga inahan ug sa ilang mga anak.

Gawas sa main health facility sa 10 ka hektaryang yuta, magtindog usab untana ug lain pang pasilidad sama sa senior citizens' wellness center ug doctors' quarters.

Nagdesisyon usab sila Gov. Kaka kaniadto nga sa Barangay Doña Helene sa Basilisa ipa-tindog ang ospital tungod kay kini ang geographinc center sa tibuok probinsya aron mas ma-access sa mga naggikan sa Loreto ug Cagdianao, ang mga anaa sa norte ug timog sa Dinagat Islands. Usa usab sa una nga hinungdan sa pagpatindog niini mao ang pagsiguro sa mas gipakusog nga health care services alang sa mga Dinagatnon nga dili na magkinahanglan moadto pa sa mga ospital sa Surigao City o sa uban pang mga probinsya.

Ang pondo nga nagamit sa Phase 1 mao ang PhP50 million, samtang ang PhP75 million mao ang gigasto alang sa Phase 2 pinaagi sa pag-facilitate sa una ni Gov. Kaka isip membro sa Kongreso nga ma'y gahum sa pagplastar sa mga alokasyon sa national budget. Gikan kini nga pondo sa Health Facilities Enhancement Program (HFEP). Na-facilitate usab ni Akbayan Senator Risa Hontiveros ang PhP10 million aron mabuo ang access road nga magkonekta sa pasilidad sa main road.

Wala pa dayon magsugod ang construction sa ospital tungod aduna'y pagbabag ang pipila, pero tungod sa signature campaign sa mga katawhan sa Dinagat Islands, napadayon kini. Wala usab nahimong operational ang ospital tungod niabot na ang panahon sa eleksyon niadtong 2019, kung diin daghan ang banned activities sama sa pagsugod sa mga bag-ong proyekto.

Pero karon, human sa kadaot nga dala ni Bagyong Odette sa Dinagat Islands, hinanaling nakig-istorya si Gov. Kaka sa Provincial DOH Office sa pagpanguna ni Lucy Tagudin aron i-facilitate sa regional level ang daling pag-abri sa pasilidad, bisan dili pa kini pormal nga matawag ug ospital. Gusto ra nila Gov. Kaka ug ang Provincial Government nga dili kini masayang ug magamit isip dugang health facility human madaot ang atong mga district hospital human sa bagyo.

Tungod sa pag-aksyon sa DOH kauban ang Provincial Government, malipayon namong i-awhag nga abri na ang health facility sa Basilisa ug mamahimo na kining adtoan sa tanang Dinagatnon alang sa nagkadaiyang health concerns. Tabangan sa DOH ug sa mga doktor ug health workers sa Provincial Government ang operations sa pasilidad kauban ang mga doktor ug medical staff sa nagkalain-laing DOH training hospitals sa tibuok nasod. Ang una nga team nga gipahimutang sa DOH mao ang gikan sa Davao Regional Medical Center nga ma'y dala nga espesyalistang doktor sa Dinagat Islands isip pakig-bayanihan nila sa mga Dinagatnon. 

Usa kini sa dakong lakang sa #BayanihanDinagat recovery initiatives isip probinsya. (Dinagat Islands Provincial Information Office/PIA-Dinagat Islands)