P1.4-M alang sa multi-purpose warehouse sa AgNor, giaprubahan
DAKBAYAN SA BUTUAN -- Mokabat sa PhP1,497,983.07 milyon ang budget sa gitakdang pagatukoron nga multi-purpose warehouse didto sa Demo Farm sa probinsya nga nahimutang sa Los Angeles, Butuan City human giaprobahan ang resolusyon nga naghatag otoridad kang Governor Dale B. Corvera sa pagpirma sa Contract Agreement tali sa napiling kontraktors.
Ubos sa Sanggunian Resolution No. 137-2022 mao ang kasabutan sa probinsya tali sa Quadcon Builders Design nga maoy mo trabaho sa konstroksyon sa multi-purpose warehouse alang sa implementasyon sa proyektong pre- and post-harvest facilities para cereals ug uban pang mga pang agrikulturang pananom diin ang badyet niini pagakuhaon sa 20% Development Fund sa probinsya sa Agusan del Norte.
Ang paghatag otoridad kang Governor Corvera sa pagpirma sa maong kasabutan giduso aron mapatuman sa kagamhanang opisyal ang paghatag og igong serbisyo ug programa sa kalamboan sa agrikultura pinaagi sa pagbaton og dekalidad nga pasilidad sa probinsya.
Gilayon nga ang hustong pagdumala sa mga nag unang panginahanglanon sa mga Agusanon magsilbi nga dakong tabang sa pagsulbad sa nagkalain-laing isyu sa katilingbanon ug ekonomiya. Dungan niini, ang pagbaton og pre- and post-harvest facilities masiguro ang kaluwasan sa pagkaon pinaagi sa pagpanalipod sa mga molds growth ug kontaminasyon.
Ang maog resolusyon giaprobahan sa Sangguniang Panlalawigan sa rekomindasyon sa Committee on Public Works sa pagpanguna ni Provincial Board Member Dick Victor Carmona atol sa ika-129th sesyon regular sa SP. (LGU-Agusan del Norte/PIA-Agusan del Norte)
