Level 2 accreditation gipunting alang sa Agusan del Norte Provincial Hospital
DAKBAYAN SA BUTUAN -- Hugot nga giduso karon sa administrasyon ni Gob. Dale B. Corvera ang accreditation sa Agusan del Norte Provincial Hospital nga mahimong Level 2 ospital aron mapaangat pa ang kalidad sa serbisyong medikal alang sa mga Agusanons ilabina sa pagtambal sa mga pasyente sa COVID-19.
Sumala pa sa personahe sa Provincial Hospital, gitutokan karon sa kasamtangang administrasyon nga ma-comply ang mga rekisitos gikan sa Department of Health (DOH) alang sa pag-upgrade sa klasipikasyon sa maong ospital. Lakip na niini ang pagbaton ug abanteng mga ekwipo nga kinahanglan sa maong pasilidad.
Subay niini, adunay bag-ong Automated Microbial Detection System Machine ug Identification and Susceptibility Testing System Machine balor Php7 million nga gi-donar sa buhatan sa DOH-Caraga. Ang nasangpit nga mga ekwipo mao ang ulahing rekisitos aron sugdan na og operate ang ICU ug NICU sa hospital.
Gawas niini, adunay usab laing gi-donar ang maong ahensya nga dedicated anesthesia machine balor Php1.8 million ug Php400,000 nga biosafety cabinet.
Ang pagpaangat sa serbisyo medikal usa sa mga prayoridad sa administrasyon ni Gob. Dale B. Corvera ubos sa programang Amomang Agusanon sa AGUSAN UP, ang kampanya sa pgpalambo sa probinsya kaabag ang buhatan ni Kongw. Angel Amante-Matba. (Karen Kie Decamotan, LGU-Agusan del Norte/PIA-Agusan del Norte)
