Pasilidades nga gisaad sa probinsyal na panggamhanan sa Agusan Norte sa Las Nieves, ipatuman na
DAKBAYAN SA BUTUAN -- Sugdan na ang konstruksyon sa Manpower Human Resource Development and PhP8 million Productivity Enhancement Center (MHRDPEC) ug usa ka PhP3.5 million nga Day Care Center sa Sitio Bokbokon, Lawan-lawan, Las Nieves ug gipunting nga mahuman kini sa dili pa mahuman ang tuig 2022.
Kini ang gibutyag ni Dr. Tomas O. Tener, ang Provincial Planning and Development Coordinator, sa pakighinabi ning semanaha.
Mahimumdoman nga gisaad ni Gob. Dale B. Corvera ang maong mga proyekto human kini gihangyo sa mga lumulupyo atol sa gipahigayong “AguSerbisyo” o immersion nga gihimo sa maong hilit nga lugar sa milabay’ng tuig.
Natulog gyod si Gob. Corvera sa Bokbokon sa maong pagbisita aron ipabati sa katawhan sa lugar ang sinseridad sa probinsyal nga panggamhanan sa pagpadangat og serbisyo alang sa kalinaw ug kalambuan.
Gawas sa mga pasilidades, ubay-ubay usab nga social services ug mga proyekto alang sa panginabuhian ang gipadangat sa probinsya sa maong komunidad nga kadaghanan sa nagpuyo mga sakop sa Tribung Higaonon.
Ang Sitio Bokbokon usa lamang sa pipila ka hilit nga sitio sa probinsya nga personal nga gibisitahan ni Gob. Corvera, uban ni Kongw. Angel Amante-Matba, aron mapadangat ang gikinahanglang mga serbisyo. (Karen Kie Decamotan, LGU-Agusan del Norte/PIA-Agusan del Norte)
