PCG nagpaabot ng iba’t-ibang serbisyo sa mga lugar na nasalanta ng bagyong Odette
Ni Jennifer P. Gaitano
LUNGSOD NG BUTUAN -- Nangunguna ang Philippine Coast Guard (PCG) sa mabilis na paghahatid ng mga relief assistance sa mga lugar na nasalanta ng bagyong Odette lalo na sa probinsya ng Surigao del Norte at Dinagat Islands.
 |
| Cpt. Dennis Pandeagua |
Ayon kay Cpt. Dennis Pandeagua, district commander ng North Eastern Mindanao Coast Guard, ito ay bilang pagtalima din sa kautusan ni Pangulong Rodrigo Duterte na tulungan agad ang mga apektadong residente .
“Sa pagbisita ni President Rodrigo Duterte sa Surigao City, mahigpit na direktiba ng presidente ang mabilis at efficient na paghatid ng ayuda sa ating mga kababayan lalung-lalo na sa island provinces ng Surigao del Norte at Dinagat Islands. At isa pang direktiba niya ay maibalik sa normal na pamumuhay ang ating mga kababayan sa lalong madaling panahon,” ani ni Pandeagua.
Bumuo din agad ang PCG ng ‘Task Force Kalinga’ para matutukan ang lahat ng distrito nito na naapektuhan ng bagyo.
Batay sa tala ng Coast Guard, nasa kabuuang 832 tons ng food at non-food items na ang naihatid na ayuda sa dalawang isla ng rehiyon.
May mga tumutulong din mula sa ibang rehiyon na nagpapagamit ng kanilang sasakyang pandagat para sa paghahatid ng mga karagdagang ayuda.
Nagsasagawa rin ang PCG ng feeding program lalo na sa mga kabataan, at nagtayo din free charging ng cellphone at iba pang gadgets sa mga apektadong lugar.
Sa mga grupo o indibidwal na gustong mag-donate ng relief goods maging ng mga construction materials para sa mga nasalanta ng bagyong Odette, hinikayat ng opisyal na makipag-ugnayan sa kanilang tanggapan para sa maayos na paghahatid at pagbibigay nito sa mga apektadong residente.
“Maaari lang po tayong tumawag sa task force kalinga at mayron tayong isang warehouse sa parola ng ating PCG gym at doon ay ipa-faciliate natin ang pagtanggap at paghatid ng relief goods sakay ng ating barko,” banggit ni Pandeagua. (JPG/PIA-Caraga)
