Monday, January 31, 2022

Cacao processing center giintrigo sa munsipyo sa Nasipit ngadto sa organisasyon sa mga mag-uuma sa cacao

DAKBAYAN SA BUTUAN -- Gi turnover na sa lungsod sa Nasipit ang Cacao Processing Center nga nahimutang sa Kinabjaban, Nasipit, Agusan del Norte ngadto sa Nasipit Cacao Farmers Venture Association Inc. (NACAFAVA).

Gipangunahan ang maong turnover ni Lydia Apatan, ang Municipal Agricultural Officer sa lungsod isip representante ni Mayor Enrico R. Corvera ug Merlyn Lomocso, ang president sa NACAFAVA, nga maoy midawat sa mga pasilidades.

Ang center magsilbing suporta sa munisipyo sa mga mag-uuma sa cacao sa lungsod nga nakadawat na og Shared Service Facilities (SSF) gikan sa Department of Trade and Industry (DTI) apan nagkinahanglan og luna nga kabutangan sa mga makinarya ug magsilbing processing center sa lugar.

Ang maong pasilidades adunay duha ka compartments diin mahimutang ang pag roast sa tableya, shell, pag winnow o tahop, pag galing ug ang molding area.

Ang pag turnover sa processing center gihimo atol sa pagsaulog sa NACAFAVA sa 5th Annual General Assembly niini nga nagdala sa tema nga “Cacao Outstanding Vision into Development - Forwarding Resiliency on Emerging Economy (COVID-FREE)”.

Ang NACAFAVA naay kapin sa 40 ka miyembro ug gilantaw nga modaku pa kini ilabina ubos sa gipahiluna karon sa probinsya nga himoong lokasyon ang Nasipit sa proyektong “Chocolate City”, usa sa mga core processing projects ubos sa proyektong Process! Process! Process! sa AGUSAN UP!, ang kampanya sa pagpalambo sa administrasyon ni Gob. Dale B. Corvera kaabag ang buhatan ni Kong. Angel Amante-Matba.  Usa ang NACAFAVA nga nagsilbi na karon nga partners sa AGUSAN UP! sa pagpatuman proyektong Plant! Plant! Plant! niini diin gipunting nga makatanum og high value crops, usa niini ang cacao sa 125,000 ektaryas pag-abot sa tuig 2027. 

“Dako gyud akong pasalamat sa mga suporta nga gipang hatag… ilabina kay Governor Dale Corvera ubos sa iyang programa sa AGUSAN UP! nga mapalambo, in fact wala silay hunong sa pag suporta sa mga mag-uuma," sumala ni NACAFAVA president Lomocso.

Mitambong usab sa maong seremonya ang mga representante sa DTI ug sa Philippine Crop Insurance Corporation (PCIC), Department of Agriculture - Agusan del Norte (DA-ADN), ug uban pang ahensya. (Shena Mae Pabia ug Ydheil Brando Zagado,Agusan del Norte/PIA-Agusan del Norte)