(PAGASA 24-HOUR PUBLIC WEATHER FORECAST as of Wednesday, 27 March 2024) Easterlies affecting the eastern section of the country. Butuan City, Agusan del Norte, Agusan del Sur, Dinagat Islands, Surigao del Norte and Surigao del Sur will experience Partly cloudy to cloudy skies with isolated rainshowers or thunderstorms due to Easterlies / Localized Thunderstorms. Possible flash floods or landslides during severe thunderstorms.


Tuesday, October 5, 2021

Oryentasyon alang sa 1,100 benepisyaryo sa Cash for Work gihimo

DAKBAYAN SA BUTUAN -- Lima ka hugna nga oryentasyon kalabot sa cash for work diha sa pagpananum og kahoy alang sa 1,100 ka benepisyaryo ang gihimo sa Barangay Buhang Gym, Magallanes, Agusan del Norte.

Unang nahatagan og oryentasyon sa buntag ang 237 ka-benepisyaryo sa Barangay Buhang. Pagkahapon gipahigayon kini alang sa 315 ka benepisyaryo sa Brgy. Caloc-an, 165 sa Poblacion, 263 sa Brgy. Sto. Niño ug 120 sa Brgy. Taod-oy.

Kabahin ang maong kalihukan sa programang Risk Resiliency Program-Climate Change Adaptation and Mitigation [RRP-CCAM] nga gipatuman sa Department of Social Welfare and Development Office [DSWD]-Caraga kaabag ang probinsya sa Agusan del Norte ug ang lungsod sa Magallanes. 

Ang pagpananum og kahoy kabahin sa Lunhaw’ng Agusan, usa sa mga Flagship Programs sa AGUSAN UP!, ang kampanya sa pagpalambo sa administrasyon ni Gob. Dale B. Corvera kaabag ang buhatan ni Congw. Angel Amante-Matba.

Ang mga benepisyaryo ubos sa cash for work makatrabaho sulod sa unom ka oras matag adlaw sulod sa 10 ka adlaw. Sweldohan sila og Php240 pesos matag adlaw.

Sumala sa representante sa DSWD nga tumong sa maong programa nga dasigon ang komunidad nga mahimong aktibo sa pag partisipar sa community projects, dugang suporta sa ilang panginabuhian, ma kunhoran ang katalagman nga dala sa climate change ug pakusgon pa ang disaster risk reduction ug climate change adaptation.

Alang sa Magallanes, mananum ang mga benepisyaryo og mangrove propagules, konstruksyon sa drainage canal, urban greening (magtanum ug fruit bearing trees) ug uban pa.

Walay puas usab ang probinsyal nga panggamhanan sa Agusan del Norte sa pag suporta ilabina sa mga programang pagpabalik sa kahimsog sa kinaiyahan sa probinsya.

"Ang probinsya ga-suporta gyod sa cash for work program ubos sa RRP-CCAM sa DSWD. Daku gyod ni og tabang sa pagpabalik sa kahimsog sa kinaiyahan ug makahatag usab sa panginabuhian sa mga katawhan sa probinsya," sumala ni Jessa Mindajao sa AGUSAN UP! Coordinating Center.

“Daku kaayo ang akong kalipay nga gitagaan ta og tabang gikan sa DSWD ning panahon sa pandemic, so daghan kayo og salamat… sa tanan nga taga DSWD region ug sa Agusan Up, tungod ani nga trabaho nga gihatag daghan gyod kaayo ang nalipay niini,” sumala ni Anecita R. Loja isip, Barangay Captain sa Buhang, Magallanes.

Kuyog sa maong oryentasyon ang mga personahe sa buhatan sa Municipal Social Welfare and Development Office [MSWDO], Municipal Planning and Development Office [MPDO] isip mga representante ni Mayor Cesar Cumba, Jr. ug mga barangay officials sa Magallanes. (Shena Mae Pabia, LGU Agusan del Norte/PIA Agusan del Norte)