(PAGASA 24-HOUR PUBLIC WEATHER FORECAST as of Wednesday, 27 March 2024) Easterlies affecting the eastern section of the country. Butuan City, Agusan del Norte, Agusan del Sur, Dinagat Islands, Surigao del Norte and Surigao del Sur will experience Partly cloudy to cloudy skies with isolated rainshowers or thunderstorms due to Easterlies / Localized Thunderstorms. Possible flash floods or landslides during severe thunderstorms.


Tuesday, September 7, 2021

43 migradwar sa pagbansay pagpadagan og negosyo

DAKBAYAN SA BUTUAN -- Migradwar niadtong Septiyembre 6, ang unang batch sa Agusan del Norte sa mga nagbansay pagdumala og negosyo ubos sa Kapatid Mentor Micro Enterprise-Money and Market Encounter (KMME-MME) Online nga gitabangan pagpundo ug pagpadagan sa Probinsya sa Agusan del Norte ug sa probinsyal nga buhatan sa Departement of Trade and Industry (DTI-Agusan del Norte).

Mosuma sa 43 ka mentees ang migradwar sa 12 ka semana nga pagbansay kansang mga mentors mga hanite sa negosyo gikan sa Philippine Center for Entrepreneurship [PCE] ug Go Negosyo sa kaulohan ug mga eksperto sa negosyo sa rehiyon ug sa probinysa, apil na ang mga personahe sa DTI-Agusan del Norte ug sa Probinsyal nga panggamhanan pinaagi sa Process! Process! Process! Team sa AGUSAN UP! Coordinating Center.

Ang nasangpit nga mga migradwar sa pagbansay gilantaw nga apil sa mga mahimong processors unya sa priority crops sa probinsya nga gipakusgan ang pagpananum karon ubos sa proyektong Plant! Plant! Plant! dungan sa pagpakusog usab sa kampanya sa pagproseso ubos sa kaluhang proyekto niini nga Process! Process! Process!, tanan ubos sa AGUSAN UP!, ang kampanya sa pagpalambo sa administrasyon ni Agusan del Norte Gob. Dale B. Corvera kaabag ang buhatan ni Kongw. Angel Amante-Matba.

Ang mga priority crops sa probinsya ubos sa AGUSAN UP! mao ang abaca, saging, cassava, lubi, cacao, kape, mangga ug laing mga prutas, rubber ug kahoy. 

Sa iyang mensahe, gidasig ni Gob. Corvera ang mga migradwar ug sumala pa kaniya “mahinangpon” silang gisugat sa probinysa tungod kay nakita diha kanila ang ang paglaum nga maoy mahimong usa sa mga yawe sa ekonokomikanhong pagpalambo sa probinsya.

Corvera

“Ang tagsa-tagsa kaninyo paglaum sa Agusan del Norte nga posibleng mahimong tigpasiugda sa mga proyekto nga mahimong usa unya sa mga yawe sa paglambo sa ekonomiya, pagmugna sa gikinahanglang trabaho ug pag-angat sa kita sa mga lumulupyo sa probinsya,” sumala pa ni Gob. Corvera.

Dugang sa gobernador nga andam ang probinsya, ingon man ang DTI ug uban pang mga ahensya, nga mosuporta sa mga migradwar sa pagpalambo unya sa ialng mga negosyo.

Mapasalamaton usab si DTI Provincial Director Brenda Corvera sa tanan nga nagpaluyo sa maong pagbansay ug nanghinaut siya nga malampusong mapalambo sa mga nagbansay ang tagsa-tagsa nila ka negosyo.

“Hope to see you finally succeed and really implement your Business Improvement Plan,” matud ni PD Brenda Corvera. (Shena Mae Pabia ug Janicesa Dramayo, LGU Agusan del Norte/PIA Agusan del Norte)