Monday, September 20, 2021

LGU-Facility Based Quarantine, hugot nga girekomendar sa PHO

Ni: Raymond Samson Aplaya

DAKBAYAN SA TANDAG, Surigao del Sur -- Girekomendar karon sa Provincial Health Office ( PHO ) dinhi sa Surigao del Sur ang istriktong pagpatuman sa LGU-Facility Based Quarantine alang ngadto sa mga kaso sa COVID-19.

Dr. Eric Montesclaros

Gibutyag ni Provincial Health Officer Dr. Eric Montesclaros nga subay sa ilang datos, nagkataas karon ang mga kaso sa maong sakit nga nakuha pinaagi sa Home Transmission o ang pagtakod-takod sulod sa pinuy-anan.

Sumala pa nga sa sitwasyon karon, wala na nila gisugyot ang pagpatuman sa Home Quarantine labi na nga hingpit na usab nga nakasulod ang Delta Variant dinhi sa probinsya sa Surigao del Sur.

Apan ang gikabalaka lang niini tungod kay daghan na nga mga eskuwelahan sa pagkakakaron nga gihimong Temporary Treatment and Monitoring Facilities ( TTMF ) sa mga LGU ang gipangkuha na og balik sa Department of Education ( DepEd ) human nga pormal na usab nga nagsugod ang klase alang sa SY 2021-2022.

Tungod niini, gidasig nalang ni Dr. Montesclaros ang mga LGUs nga magpatukod na og kaugalingon nga quarantine facilities alang sa ilang mga konstituwente nga magkinahanglan niini.

Una niini, gipahibalo na sa PHO nga anaa na sa High Risk sa COVID-19 karon ang tibuok probinsya basi sa National Standard Average Daily Attack Rate Computation. (Radyo Pilipinas1-Tandag/PIA-Surigao del Sur)