SBDP ng NTF-ELCAC pormal na inilunsad sa Surigao Norte
LUNGSOD NG
SURIGAO, Suriago del Norte -- Limang
Barangay ng probinsiya ng Surigao del Norte ang mabibigyan ng opurtunidad upang
suportahan ang ninanais na kaunlaran sa pamamagitan ng inilunsad ng Provincial
Task Force-End Local Communist Armed Conflict o PTF-ELCAC na Local Government
Support Fund para sa Support to the Barangay Development Program (SBDP).
Ang mga
barangay na unang makakatanggap o magiging benepisyaryo ng nasabing programa ay
ang mga barangay ng Dugsangon at Camboayon na parehong sakop ng bayan ng Bacuag
at ang mga barangay na Mahanub, Lahi at Camam-onan na sakop ng bayan ng
Gigaquit. Ang mga nasabing barangay din ay nadeklarang ‘cleared’ mula sa
presensya ng mga Communist Terrorist Groups o CTG.
Sa
pagnanais ng lokal na pamahalaan ng Surigao del Norte na mapabuti at mapalakas
ang partisipasyon ng buong katauhan upang maipalaganap ang tinatawag na
whole-of-nation approach na naglalayong buwagin na ang kaguluhan na hatid ng
terorismo ay nagsagawa ng PTF-ELCAC symbolic launching kamakailan na ginanap sa
tanggapan ng Provincial Governor sa Kapitolyo ng Surigao del Norte.
Ito ay para rin sa pagbibigay ng local government support fund upang matugunan ang mga proyekto sa ilalim ng Barangay Development Program.
Isa sa mga pangunahing ginawang paglulunsad ay ang paggawad ng P20 milyong piso sa mga kapitan ng limang barangay bilang suporta sa kanilang mga proyekto at mapadali ang pag-unlad at pagbangon ng mga komunidad sa mga naturang barangay.
Sa kabuoan, may 49 mga barangay sa probinsya ng Surigao del Norte ang napagkalooban ng P20 milyong piso para sa mga development projects sa pamamagitan ng SBDP ng NTF-ELCAC.
Ayon kay Gov. Francisco “Lalo” Matugas ng Surigao del Norte, malaking tulong ang pagpapatupad ng programang ito ng pamahalaan para sa pagpapaunlad ng kanilang mga barangay.
"Malaki ang aking pasasalamat sa national government lalo na kay Pangulong Rodrigo Roa Duterte para sa kanyang mga pangako na nararamdaman natin na kanyang tinutupad upang wakasan na ang kaguluhan dala ng terorismo sa ating lalawigan. Hindi lamang limang barangay ang makakatanggap ng suporta mula sa LGSF kundi may apat na put siyam tayong barangay na makikinabang para sa suporta sa mga proyekto na nakapaloob sa BDP. Nawa'y ang pondo na ito ay magsilbing panimula ng isang barangay tungo sa pag-unlad at pagbabago. Hindi dito nagtatapos ang ating layunin na tapusin ang insurhensiya sa kada barangay kundi marami pang programa ang naghihintay para sa kanila," ani Gov. Matugas.
Magkakaroon ng mga ground breaking ceremonies sa susunod na mga buwan na gaganapin sa mga nasabing recipient barangays sa buong probinsya ng Surigao del Norte.
Ang nasabing programa ay dinaluhan din nina Brigadier General George L. Banzon, commander ng 901st Brigade; Lt. Col. Ryan Charles G. Callanta, commander ng 30th Infantry Battalion; opisyal ng SDN Provincial Police Office; Julito P. Go ng Brgy. Mahanub, Romualdo M. Moreno ng Brgy. Dugsangon; Jevelyn D. Abad ng Brgy Camboayon; Indayflor B. Bangga ng Brgy. Camam-onan, at Carmen D. Peruda ng Brgy. Lahi. (30IB, Phil. Army/PIA-Surigao del Norte)
