Gravid blue crabs i-regulate na sa Cabadbaran
DAKBAYAN
SA BUTUAN -- I-regulate na sa syudad sa Cabadbaran ang gravid blue crabs ug
crablets basi sa gi-aprobahang City Ordinance No. 2021-012 nga gipangamahan ni
Sangguniang Panglungsod Member Celson A. Sanchez.
Gi-aprobahan
ug gideklarang balido sa Sangguniang Panlalawigan ang maong city ordinance
pinaagi sa Sanggunian Resolution No. 270-2021, sa pagpaningkamot ni Bokal James
T. Reserva.
Ubos sa
Seksyon 1 sa maong ordinansa, gidili na ang pagpanguha, pagpamaligya,
pagpanag-iya, o pagpalit sa gravid blue swimming crabs ilabi na
kadtong wala pa niabot sa saktong kabug-aton gikan sa kadagatan ug mangrove
swamps nga sakop sa teritoryo sa syudad sa Cabadbaran. Gidili usab ang paggamit
og pukot nga ubos sa 12 sintemetro ang mesh size lakip na ang pagpangisda sa
lugar ubos sa 10 metros ang kalawmon aron maprotektaran ang mga alimangong
gagmay pa. Laing gidili ang BSC fishery nga walay permit nga gi-issue gikan sa
City Agriculture Office sa Cabadbaran City.
Ang gravid
blue swimming crabs mao kadtong egg bearing crabs nga kasag, lambay, masag ug
alimasag nga klase sa alimango.
Silotan
kadtong si bisan kinsa nga musopak sa ordinansa pinaagi sa multa ug pagkapriso:
Ang 1st Offense - pagsaway; 2nd Offense - multa nga 1,500 ug pagsuspinde sa
permit nga dili molapas sa traynta (30) ka adlaw ug ang gravid crab ug mga
juvenille crab ang kumpiskahon ug ibalik sa natural nga puy-anan; ug ang 3rd
Offense – usa ka multa nga kantidad nga 3000 o pagkapriso sa pito (7) ka adlaw
o pareho nga multa ug pagkapriso sa paghukum sa korte ug pagkumpiska sa mga
gamit sa pangisda ug pagdakup ug pagbawi sa permit. Kung ang nakasala
naglambigit sa pagkansela sa fish vending sa business permit sa negosyo dugang
sa gilatid nga pagkapriso sa pagbuot sa korte.
Naaprobahan ang Sanggunian Resolution No. 270-2021 atol sa ika-14 sesyon regular sa Sangguniang Panlalawigan. (Jessica O. Mellejor, LGU Agusan del Norte/PIA Agusan del Norte)
