Wednesday, June 30, 2021

Hepe sa ASTMMC, gikumpirma nga aduna mga pasyente sa COVID-19 ang kumpleto ng nabakunahan 

DAKBAYAN SA TANDAG, Surigao del Sur -- Gikumpirma ni Dr. Janice Pagaran – Alcordo, Medical Center Chief sa Adela Serra Ty Memorial Medical Center (ASTMMC) nga aduna sila’y pasyente nga nahilandig sa ilang COVID-19 Critical Care Unit nga kompleto na nga nabakunahan sa COVID-19 vaccine.

Sa pakighinabi sa Radyo Pilipinas – Tandag, gibutyag niini nga aduna silay mga gipang-atiman karon nga mga senior citizens nga nabakunahan na sa ilang first dose samtang aduna usab uban nga nakadawat na sa ilang 2nd dose.

Kadaghanan matud pa kanila ang napahimutang sa COVID ward samtang adunay usa nga anaa sa CCU. Gawas niini, aduna usab silay mga staff karon nga bisan paman nga kumpleto na sa bakuna apan nataptan pa gihapon sa maong sakit.

Hinuon, anaa na matud pa sa stable nga kondisyon ang maong mga pasyente. Nagtuo si Dr. Alcordo nga posibleng usa sa rason niini mao ang pagkumpiyansa na sa mga taong nabakunahan kung diin ang uban kanila ang wala na nagsunod sa Minimum Public Health Standards batuk sa maong sakit.

Gipasabot niini nga ang bakuna wala nagpasabot nga dili na mataptan sa COVID-19 ang nabakunahan nga indibidwal. Tungod niini, padayon nilang gipatuman ang pagpailawom sa RT-PCR Test sa tanang mga pasyente ug watchers nga musulod sa maong ospital aron malikayan ang pagtakod – takod pa sa maong sakit. (Raymond Samson Aplaya - RP1 Tandag/PIA-Surigao del Sur)