Bora-bora muffler gidili sa Buenavista
By SV Deligero
DAKBAYAN SA BUTUAN, Nobyembre 20 -- Gidili karon sa lungsod sa
Buenavista ang paggamit og bora-bora muffler sa unsamang sakyanan pinaagi sa Municipal
Ordinance No. 13-2020 nga gideklarang balido sa Sangguniang Panlalawigan atol
sa sesyon regular niini kaniadtong Nobyembre 3.
Ang maong lakang nahisubay sa Provincial Ordinance No. 498-2020 nga
nagdili sa paggamit og bora-bora muffler sa probinsiya.
Ang pag adopt niini sa lungsod sa Buenavista giilang makahatag og dakong
tabang nga malimitahan ang kasaba ug disturbo nga mahatag niini sa palibot ug
ma-regulate ang daghang aso nga buga gikan sa muffler nga makahatag hulga sa
kahimsog ug kaluwasan sa katawhan.
Kini ipatuman sa maong lungsod pinaagi sa pagpahamtang og multa nga nag
kantidad og usa kalibo ug lima kagatos(P1,500) ka pesos ug pagkompiska sa
bora-bora o pagkapriso sulod sa usa kabulan ni kinsamang nag gamit og bora-bora
type muffler.
Ang pag-aproba sa balay-balaoranan sa Probinsiya giduso sa pagpaningkamot ni Board Member Erwin L. Dano pinaagi sa Sanggunian Resolution No. 494-2020. (LGU Agusan del Norte/PIA Agusan del Norte)
