Gob. Corvera: Tuig 2020 mahimong puno sa
aksyon
By Angel F. Gaviola
ug Ron Amante
DAKBAYAN SA BUTUAN, Enero 7 -
Mahimong puno sa aksyon ang tuig 2020 tungod kay gusto ni Agusan del Norte Gob.
Dale B. Corvera ang paspas nga lihuk sa mga empleyado pagpatuman sa mga
proyekto ilabina ang lambigit sa AGUSAN UP!, ang walo ka punto nga agenda sa
Development Team Agusan del Norte ubos sa iyang administrasyon nga nagtinguha
pagmugna og mas daghan pang oportunidad aron molambo pa ang kahimtang sa
pagpuyo sa mga Agusanon.
Kini ang unod sa mensahe sa
gobernandor atol sa unang Monday Convocation Program kaganihang buntag (Enero
6) nga gihimo sa Capitol grounds kauban ang mga empleyado sa probinsya.
Sa iyang mensahe, gipasabot ni
Gob. Corvera nga buot niyang makita ang taas nga performance ratings sa mga
empleyado subay sa ilang nalatid nga mga plano ubos sa AGUSAN UP!
Lambigit niini, nasayran nga
nagpatawag na ang gobernador og meeting sa tanang hepe sa sa mga buhatan sa
kapitolyo karong Enero 14 aron tukion ang ilang mga targets ug nakalatid og mga
proyekto nga konektado sa AGUSAN UP!
Ang AGUSAN UP! gilangkuban sa upat
ka flagship programs: 1. Agus 3Ps o Plant and Process for Prosperity (alang sa
ekonomikanhong kalambuan), 2. Amumang Agusanon (alang sa sosyal nga kalambuan),
3. Lunhaw’ng Agusan (alang sa pagpasiuli sa kabaskug sakinaiyahan), ug 4.
Hiniusang Lihuk Agusan (alang sa mga serbisyo pagpalambu sa sistema ug proseso
sa pagdumala).
Pinaagi niini nga mga programa
gipunting nga makab-ot sa probinsya ang panglantaw niini nga mahimong
agri-forest processing center ug economic zone sa Caraga pag-abot sa tuig 2027
ug makunhoran ang gidaghanon sa mga pobreng pamilya gikan sa 34% karon ngadto
sa 15% na lang. (AGUSAN UP, Agusan del Norte/PIA Agusan del Norte)
