Saturday, April 4, 2015

Cebuano News: Ambush sa San Miguel, mikalas og 3 ka kinabuhi og laing 6 nasamdan

Ni Nida Grace P. Barcena

SAN MIGUEL, Surigao del Sur, Abril 4 (PIA) – “Patraydor nga gitambangan sa grupong New People’s Army ang kasundaluhan sa 41st Division Recon Company ug 4th Field Artillery Battalion didto sa Sitio Ban-as, Barangay Mahayag, San Miguel, Surigao del Sur niadtong Abril 1 sa gabie,” kini ang gipagawas nga pamahayag sa 36 Infantry Battalion nga gipangulohan ni LTC Anastacio Suaybaguio nga nakabase sa Tago, Surigao del Sur.

Sumala pa sa taho, nga kini nahitabo samtang nagsakay ang tropa sa upat ka sakyanan sa militar  kalit lang kining gi-ambush ug gipabuthan sa mga bomba (landmines) sa mga gituohang rebelding New People’s Army.

Ang maong insedente miresulta sa pagkalagas sa tulo ka kinabuhi og laing unom usab ang nasamdan. Duha sa mga namatay miyembro sa military og usa niini ang sibilyan samtang lima sa mga kasundalohan ang nasamdan og usa usab ang sibilyan.

Kahibaloan sa miageng bulan, ubay-ubay na ang susama niiini nga mga panghitabo nga gihimo sa rebeldeng NPA dinhi sa Surigao del Sur nga diin ubay-ubay na usab nga mga yano ug inosenting katawhan ang nadamay sumala pa sa sulat pamahayag sa militar.

Sa maong panghitabo, nagpaabot ang mga miyembro sa kasundalohan og kinasing-kasing nga pakigtimbaya ngadto sa nagbangutang pamilya sa mga biktima sa pagpang-ambush sa NPA.


Sa susamang taho, ang kapulisan sa probinsya pinaagi ni Police Provincial spokesperson SPO2 Ranilo Malong nga sigon sa ilang gihimong imbestigasyon ang maong engkwentro mokabat 20 minutos nga panagbayloay sa bala. Subay sa taho, samtang nagbiyahe ang upat ka mga sakyanan sa kasundalohan gikan sa Barangay Carromata sa may alas 9:15 sa kagabhion niadtong Abril 1 sa may Sitio Ban as, Baryo sa Mahayag nahitabo ang pagpangambush kanila. (NGB/PIA-Surigao del Sur)