2.25.2013

PIA News Service - Monday, February 25, 2013



Cebuano news: DAR-Surigao Norte mu apod-apod og mga titulo sa yuta didto sa Mainit

Ni Susil D. Ragas

SURIGAO CITY, Peb. 25 (PIA) -- Ang buhatan sa Department of Agrarian Reform (DAR) Surigao del Norte gikatakdang mo apod-apod og mga Certificates of Landownership (CLOA) ngadto sa mga benepisyaryong mga mag-uuma sa lungsod sa Mainit karong Pebrero 27, 2013 alas 9:30 sa buntag didto sa covered court sa Brgy. Tagbuyawan, Mainit, Surigao del Norte.

Adunay mokabat sa 131 ka mga titulo ang ipanghatag nga naglangkob sa mokabat 194.6665 ka ektarya sa yuta ngadto sa 126 ka mga benepisyaryo diin 65 ka CLOAs ug 122.8662 ka ektarya nga yuta ihatag ngadto sa mga benepisyaryo sa Brgy. Tagbuyawan, 46 CLOAs ug 55.5887 ektarya ngadto sa Brgy. Mansayao ug 20 CLOAs ug 16.2116 ang ihatag ngadto sa Brgy. Tolingon, Mainit, Surigao del Norte.

Ang maong pag pang apod-apod nahisubay kini sa misyo ug bisyon sa DAR aron pangunahan ang implementasyon sa reporma sa yuta ug kalamboan sa kalungsuran pinaagi sa paghatag sa mga mga-uuma sa katungod sa yuta ug aron palamboon ang hiniusang kaayuhan ug mga serbisyo ngadto sa mga walay yuta ug gagmay nga mga mag-uuma.

Gikatakdang motambong atol sa maong kalihukan sila Governor Sol F. Matugas, Congressman Guillermo Romarate Jr., Mayor Ramon B. Modano sa Mainit, DAR-Regional Director Faisar A. Mambuay, Surigao del Norte Provincial Agrarian Reform Officer Teresita E. Depeñoso, ug Jose B. Endico, Municipal Agrarian Reform Officer sa Mainit, Surigao del Norte. (Edilberto Odvina, DAR-Surigao Norte/PIA-Surigao del Norte)