PIA News Service - Sunday, September 18, 2011

Cebuano News: Pagbantay sa buwayang si ‘Lolong’, gipahugtan human nga dunay hulga sa iyang kinabuhi

BUTUAN CITY, Sept. 18 (PIA) -- Mas gipahugtan karon ang pagbantay sa buwayang si Lolong tungod sa hulga gikan sa pipila ka grupo o' individual nga kontra sa pagpuyo karon ni Lolong sa giant fen.

Mahinumduman nga dunay grupo nga kontra sa nahimutangan ni Lolong kondiin ila pang girekomenda nga kinahanglang mabalik si Lolong sa iyang gipuy-ang lugar.

Kini aron nga makalihok sa insakto, maka-relax ug dili maapektuhan ang kondisyon ni Lolong tungod kay ang nahimutangan ni Lolong sa pagka karon dili matud pa tukma alang kaniya.

Giplano usab karon sa lokal nga panggamhanan sa lungsod sa Bunawan, Agusan del Sur nga magbutang ug CCTV camera sa palibot sa giant fen aron nga mamonitor ang mga tawo nga mubisita ug makig-asyuso kang Lolong.

Gika-alarma usab ni Bunawan Mayor Edwin Elorde ang mga gihugon-hugon nga basin ug dunay musabotahe sa buwayang si Lolong ug magbutang ug chemical aron nga mahilo ug hingpit nang mamatay si Lolong ug ang Mayor na matud pa ang basulon sa posibleng mahitabo kang Lolong. (PIA-Caraga)

.

Cebuano News: Bihag na mayor sa Surigao Sur, naka-estorya sa Local Crisis Mgt; SOMO sa 5 probinsya, subling gihangyo

BUTUAN CITY, Sept. 18 (PIA) -- Naka-estorya na sa Local Crisis Management ang gibihag nga mayor sa Lingig, Surigao del Sur nga si Henry Dano kinsa kapin usa ka buwan nang atua sa mga kamut sa rebeldeng New People's Army (NPA).

Sa interbyu kang Surigao del Sur Gov. Johny Pimentel, gikomperma ni Mayor Dano sa iyaha nga anaa kini sa maayong kahimtang og subling gihangyo sa mayor ang Suspension of Military Operations (SOMO) aron buhian na siya sa iyang mga abductors.

Una nang gipangayo sa NPA nga ihunong ang military operations sa lima (5) ka probinsya nga naglangkob sa Agusan del Sur, Surigao del Sur, Compostella Valley Province, Davao Oriental, ug Bukidnon.

Sa maong hisgutanan, giklaro sa gobernador nga bugtong ang operasyon sa militar sa iyang probinsya ang kaya niyang mapahunong, apan sa ubang probensya, wala na siya’y kagahum sa pagpahunong sanglit dili na kini sakop sa iyang hurisdiksyon. (BR/PIA-Caraga)

.

Cebuano News: Army brigade sa Surigao del Sur, nagpahimangno sa mga executives batuk sa mga NPA

BUTUAN CITY, Sept. 18 (PIA) -- Gipahimangnuan ni Col. Romeo Gan, ang brigadier commander sa kasundaluhan sa Surigao del Sur, ang mga negosyante ug mga opisyal sa lokal nga panggamhanan nga dili ihatag ang demand sa mga komunistang rebelde sa ilang lugar.

Sigon sa opisyal, ang pagsanong sa demand sa mga rebelde, mupasamot lang sa ilang pagpangilkil hinungdan nga dili na matud pa, angayang hulatonn nga sila na ang mabiktima sa maong mga rebelde.

Kini ang reaksyon ug panawagan sa opisyal subay sa nagkagrabe nga extortion activities sa Communist Party of the Philippines ning nakalabay'ng mga bulan sama sa pagpanunog sa mga heavy equipment sa Bislig Ventures niadtong Septembre 6 didto sa Lingig, Surigao del Sur ug laing mga sakyanan sa Bunawan, Agusan del Sur ning mi-aging buwan.

Dugang sa opisyal, gipatas-an na sa mga rebelde ang ilang collection rate hinungdan nga angayan na kining batukan aron dili na makapanghadlok sa mga negosyante ang maong mga rebelde. (BR/PIA-Caraga)