Cebuano News: Board Meeting sa mga opisyales sa BCMC gipahigayon
ni Gerry G. Gabiana
BUTUAN CITY, Hulyo 3 – Gipahigayon ang Board Meeting sa Butuan City Medical Center (BCMC) bag-ohay pa lamang sa mismong conference room sa nahisgutang pampublikong tambalanan.
Gitambongan kini ni Mayor Ferdinand M. Amante, Jr., Dr. Virgilio Nery, chairrman sa komitiba sa panglawas, Association of Barangay Captain (ABC) President Nestor B. Amora, Dr. Josephine C. Chua, hepe sa City Health Office ug ubang miyembro sa Board.
Isa sa gihataga’g dakong pagtagad ug diskusyon ang kabahin sa mga reklamo nga gipaabot sa buhatan ni Dr. Nery ang kabahin sa grupo sa mga nagpapatigayon ug mga parmasiya diha sa atubangan sa BCMC nga hospital, laban sa gi-aligar nga MAGCI o MA Global Charity Institution Incorporated ubos sa pagpangulo sa nagngangalang Bishop Anota.
Sa kukabildong gipahigayon, mipatim-aw ang kamatuoran ug pag-angkon sa usa sa mga security guards nga adunay nabuhat nga canvassing nahitabo ngadto sa mga tawo kansa gusto mopalit ug medisina sa botika dala ang mga resita sa mga doctor diha sa BCMC pabor alang ngadto sa EJM Pharmacy.
Mao nga ang silingang kauban niani nga parmasya dihado sa gibuhat sa mao nga mga guwardiya on duty diha sa entrance ug exit sa nahisgutang hospital. Daghan mang aligasyon ang giduso laban sa MAGCI ug EJM Pharmacy anaa sa Board sa BCMC ang paghimo ug hustong aksyon sa hinanaling panahon uban sa ilang hepe nga si Dr. Joyce Hidalgo.
Samtang sa laing bahin sa mga reklamo sa nanag-iya ug mga botika ilang buhaton ang pagbuyagyag sa tanan nilang nahibaw-an arun makab-ot ang transparensiya sa mga nagdumala sa nahisgutang hospital.
Dili ikalimod nga ang ilang reklamo midangat na kang Mayor Jun Amante ug nagapa-abot ug naglaum nalang sila sa hapsay ug patas nga pagdumala diha sa sulod ug ngadto kanila nga nagpapatigayon sa maong nasangpit nga parmasya. Samtang sa hisgutanang MOA kon Memorandum of Agreement tali sa MAGCI ug City Government maoy angay pang estudyuhan, susihon ug ebalwasyonon kung angayan bang usbon o ipadayon likod sa mga kakulangon, gihatagan ug kagahum ang Board nga maoy magpadayon sa pagtoki ug pagtahi niini nga mamahimong kaayuhan ang nilugdangan niini nga hisgutanan.
Samtang si Mayor Jun Amante mipasalig nga hatagan na ug angayang agi-anan ang mga katawhan inig padulong sulod ug gawas diha sa BCMC arun malikay sila sa agi-anan sa mga sakyanan.
Matud pa, adunay igong pondo nga gikabutyag sa atong Mayor apan nagapaabot kini sa resolution nga iduso ug ipasa ni Dr. Nery kinsa maoy tsirman sa komitiba sa panglawas niining dakbayan sa Butuan. (Butuan City PIO/PIA-Caraga)
.
Cebuano News: Civil Wedding gipahigayon alang sa 4 ka partisan
ni Jovelyn C. Mejorada
BUTUAN CITY, Hulyo 3 -– Sa tumong nga mapatunhay sa kagamhanag lokal ni’ng dakbayan ang sagrado sa kaminyoon, upat ka mga parisan ang gikasal sa buhatan sa City Mayor’s Office dili pa lang dugay.
Sa pagdumala ni Mayor Ferdinand Amante, Jr., gihimo ang seremonya agi’g pag-ila sa kasagrado sa kaminyoon butang nga angayan gayud nga paga-bendisyonan ang mga magti-ayon.
Ang maong seremonya gisalmutan sa sa mga mosunod nga parisan: Ritchelyn Autor Pimentel ug Ide Pimentel, lumulupyo sa AD. Curato Street; Mary Grace Pimentel ug Dennis Rante, lumulupyo sa Purok -2A Barangay Ampayon; Annabelle Corseno Rodriguez ug Conrado Rodriguez nga taga Bad-as Surigao del Norte ug Purok- 6 Barangay Doongan; ug ingon man sila Ceriano Atillo Sasil Jr. ug Mary Grace Bendijo Pellano, lumulopyo sa Purok 4, Barangay Pinamanculan n’ing dakbayan sa Butuan. (Butuan City PIO/PIA-Caraga)
.
Cebuano News: City Veterinarian padayon sa paghatag og serbisyo sa mga Butuanons
BUTUAN CITY, Hulyo 3 – Ang buhatan sa City Veterinarian ni’ng dakbayan padayon sa pagtunol sa mga libreng batakang serbisyong pampubliko sama ning musunod: Anti Rabies Vaccination alang kini sa mga Iro ug Iring, Treatment o pagpanambal sa mga nagkadaiyang matang sa hayop ug uban pa, ubos sa pagdumala sa City Veterinarian nga si Dr. Mancio Danilo A. Alegado.
Mahinumduman nga niadtong Hunyo 17 hangtod sa pagsulat niini nga balita, nangadto na usab sila sa nagkadaiyang kabarangayan ni’ng atong dakbayan aron sa pagtunol sa mga nagkadaiyang serbisyo, gani pa man bag-ohay pa lamang nipadayugdog ang maong mga personahe sa may Barangay Dumalagan aron sa pagpahigayon sa artipisyal nga insiminasyon alang sa mga baka, kabaw ug baboy.
Dugang pa sa maong opisyal nga kadtong gusto mo du-aw sa ilang buhatan adunay mga libreng tambal nga ilang ipang-apod-apod. (Mayor’s Patroller, Butuan City PIO/PIA-Caraga)
.
Cebuano News: Mga miyembro sa Butuan City Chamber of Commerce and Industry Foundation, Incorporated, nagkahiusa
ni Jovelyn C. Mejorada
BUTUAN CITY, Hulyo 3 -– Nagkahiusa ang mga nagkadaiyang mga miyembro sa Butuan City Chamber of Commerce and Industry Foundation Incorporated alang sa tinuig nga panagtagbo bag-ohay pa lamang didto sa 4th floor sa Green Bank Montilla Boulevard uban ni Mayor Ferdinand M. Amante Jr. aron mas mapalambo ang business industry sa dakbayan.
Sa maong panagtigum, nasayran nga sulod sa pagpangatungdanan sa bag-ong administrasyon, milambo ang ekonomiya sa dakbayan diin gikalipay kini sa matag miyembro.
Subay niini, gipaningkamutan ni Mayor Amante nga mapadayon ug masugdan na gayod ang mga proyekto kabahin sa pag-improbar sa mga kadalanan aron maprotektahan ang mga negosyo sa dakbayan panahon sa kalamidad. Sa ingon niini, mas mokusog ang mga patigayon ug mudaghan ang mga investors nga motukod ug negosyo aron mamahimong mas madali ang dugay nang gipangandoy nga kalambuan ug progresibong Butuan. (Butuan City PIO/PIA-Caraga)
