10.08.2010

PIA News Service - Friday, Oct. 8, 2010

Cebuano News: ConsumerNet Welfare Month, gisaulog sa Butuan City

Ni Michael Imbo

BUTUAN CITY
- Gisugdan ang tinuig nga pagsaulog sa Consumer Welfare Month nga giduyogan sa mga konsumador ni’ng syudad alang sa paghatag importansya sa produktong dekalidad ug mga negosyong nakahatag sa dakung kahigayunan nga mapalambo ang ekonomiya dinhe sa rehiyon sa Caraga.

Ang Department of Trade and Industry (DTI) ubos kang DTI-Regional Director Brielgo Pagaran ang nanguna sa programa pinaagi sa paghan-ay sa nagkadaiyang mga aktibidades sulod sa usa ka bulan nga kalihukan.

Niadtong adlawng Biyernes (Oct. 1, 2010) adunay gihimong “walking parade” alas 6:00 ang takna sa buntag nga gisugdan didto sa Rizal Park, subay sa highway sa J. C. Aquino padulong sa DTI-Caraga Regional Office.

Personal kini nga gitambungan ni Butuan City Mayor Ferdinand M. Amante uban sa lokal nga kagamhanan, mga sakop sa ahensya sa gobyerno, Butuanong Kunsumador ug uban pa.

Si Mayor Amante ang mapasalamaton sa suportang gigahin sa mga kunsumador nga mauy nahimong inspirasyon aron makab-ot ang kalamboan sa negosyo ug produktong mapasigarbo sa dakbayan lakip na sa rehiyon sa Caraga.

Si Mr. Elmer Natad sa DTI-Caraga Regional Office sa iyang mensahe mipaabot sa dakung pagpasalamat ngadto sa mga nagkadaiyang ahensya nga migahin sa ilang suporta aron matuman ang kalihukan nga nagsentro sa kina-iyahan ug pagpadaghan sa produksyon sa pagkaon ug pagkontrolar sa presyo sa palaliton.

Human sa hamubo nga programa mideretso ang grupo didto sa Barangay Mazau beach resort ug gilusad ang coastal clean-up nga gipangunahan sa Department of Environment and Natural Resources (DENR) kinsa mipahigayon sa paghinlo kauban ang mga nagkadaiyang ahensya sa gobyerno.

Nahimo nga mabungahon ang kalihukan nga nagmalampuson pinaagi sa suporta sa nagkadaiyang sector ilalom sa temang “Consumers: Green Multipliers”. (PIA-Caraga)
.
.

Cebuano News: Outstanding OFW family sa Caraga gipasidunggan

Ni Michael Imbo

BUTUAN CITY – Malipayong nakadawat sa awards ug pinansiyal nga suporta ang mga istorya sa mga Overseas Filipino Worker (OFW) nga naningkamot sa ilang pagpanarbaho gawas sa nasud.

Niadtong Martes (October 5, 2010) gipahigayon ang awards nga gipangunahan sa Overseas Workers Welfare Administration (OWWA) Caraga Region ilalom sa pagdumala ni Regional Director Marieta Arcena-Lumawag, didto sa Dotties Place Convention Hall, ni’ng dakbayan.

Ang ahensya sa OWWA kaabag ang Department of Labor and Employment (DOLE) mihupot sa tradisyunal nga kalihukan sa pagpili ug MODEL OFW FAMILY OF THE YEAR AWARD (MOFYA) aron pasidunggan kadtong mga pamilyang milampos sa ilang panginabuhian.

Kini ang programang naghatag sa kahigayunan nga matagad ang mga taga Caraga nga nanarbaho sa laing nasud nga mapiling outstanding OFW.

Gibahin sa duha ka kategoriya ang nailang OFW nga nagikan sa land-based ug sea-based. Ang pamilyang gipasidunggan mao sila si Mr. ug Mrs. Lilia C. Cabrera sa land-based ug Mr. ug Mrs. Mamerto S. Sore sa sea-based hasta pod ang pamilya ni Engr. Benjamin S. Selim. Ang kompanya sa Globe midominar sab sa kantidad nga P20,000.00 sa pamilyang gipasidunggan.

Base sa report, duha ka MOFYA Regional winners ang napiling hatagan sa maong awards lambigit sa natabang sa komunidad sama sa Outstanding achievement in community projects ug outstanding achievement entrepreneurship.

Apil sa maong program ang giduso sa pagtukod sa OFW Help Desk pinaagi sa Memorandum of Agreement (MOA).
(PIA-Caraga)