Cebuano News: Balltap Sarc gilunsad
BUTUAN CITY (November 6) – Usa ka malampusong launching program sa Special Agrarian Reform Community nga BALLTAP didto sa munisipyo sa Cagwait, probinsya sa Surigao del Sur.
Sa maong okasyon, gitambungan kadto sa mga personahe gikan sa DAR ug representante gikan sa nagkalain-laing partner agencies sa DAR sama sa NIA, DPWH, DTI, PCA, LBP, OPAG, NCIP ug ang mga opisyales sa LGU Cagwait nga gipangunahan ni Mayor Bonifacio Ondona.
Tumang kalipay ang nabati sa mga nitambung sa maong okasyon tungod sa presensya sa Undersecretary for Support Services sa Department of Agrarian Reform nga si Hon. Rosalina Bistoyong, Director Rodulfo Bueno, Regional Director Engr. Felix B. Aguhob, PARO Benjamin M. Mataksil, CARPO Jerry Villason, CARPO Victor Canda, CARPO Hernane Apacible, MARO Wilson Sadernas, DARPO/DARMO Staff ug uban pang dignitaries gikan sa national ug local nga panggamhanan.
Sa unang higayon sa Surigao del Sur nga ang munisipyo sa Cagwait mao pay una nga munisipyo nga tanan barangay nahimong Agrarian Reform Community (ARC). Dili matukib ang kalipay ilabina sa mga mag-uuma kon Agrarian Reform Beneficiaries (ARBs) nga ang ilang barangay karon mahimo ng ARC nga diin kon adunay mga proyekto sa DAR pinaagi sa Foreign Assisted Projects (FAPs) madali ra nga makakuha o makasulod ang mga proyekto sa ilang barangay.
Ang BALLTAP SARC ge-compose ug lima ka barangay apil na ani ang: Balocod, La Purisima, Lactudan, Tawagan ug Poblacion. Adunay 51 ka Farmer Beneficiaries nga CLOA Holders ug 131 ka Leaseholders agi sa programa sa Comprehensive Agrarian Reform Program. Ubay-ubay ang gipangsaysay nga mga proposed projects nga kulang sa ilang komunidad sama sa Communal irrigation system, Farm-to-market roads, Livelihood projects, Health center, Bridges, Culvert, ug Potable water system.
Nanghinaot ang mga residente nga mahimong ma-realize ang tanang proyektong ilang gipangandoy sa dugay na nga panahon. (Myra L. Quizada, DAR-Surigao del Sur/ PIA-Surigao del Sur)
Cebuano News: Kalidad nga panirbisyo sa programa ni Gov. Ace Barbers sa maayong panglawas kanunayng gipatuman
SURIGAO DEL NORTE (November 6) - Gipaningkamutan sa Provincial Health Office pinaagi kang Doc Audie Relliquette nga ang kalidad nga serbisyo nga programa ni Gov. Barbers sa maayong panglawas kanunayng mahatag sa mga katawhan.
Nagpadayon ang mga medical consultations, dental ug laboratory services diha sa PHO Clinic ug laboratory, diin ubay-ubay sa atong mga kaigsuonang Surigaonon ang nakapahimulos niini.
Sa milabay nga semana, Oktubre 28 ug 29, 2008 mihimo ug usa ka Information, Education Campaign ug adbokasiya kabahin na sa mga Case Finding ug Malacological Survey para sa Schistosomiasis Program, diin 417 ka mga kliyente ang naalagaran niini didto sa San Isidro, Gigaquit ning lalawigan. Ang maong panirbisyo inabagan usab sa Provincial Health Team diin gihatagan ug mga pagpangtambal ang tanang may positibo ang resulta.
Sa laing bahin, nagmalampuson usab ang gihimong Area Health Board Meeting niadtong Oktubre 31, 2008 sa Cabuntog Beach Resort sa General Luna, diin naapud-apud sa matag munisipyo ang Proporma for Siargao Health Zone MOA alang na sa pag-amenda ug adoption niini. Gikatakda usab ang pagahimuon nga Oath Taking sa Siargao Area Health Zones Officers diin temporaryo kining ikatakda karong Disyembre 12, 2008.
Sa maong tigum, nasayran nga ang paghisgut-hisgut sa 20 ka partisipante nagmabungahon kabahin na sa mga isyus ug mga kakulangon nga ilang angayng sulbaron kabahin na sa maayong panlawas aron mahilakip kini sa pagahimuon nga Provincewide Implementation Plan for Health. Dako ang pasalamat ni Gov. Barbers sa gipakita usab nga kakugi sa tanang mga health personnel sa PHO ug mga health workers sa mga kalungsuran labi na gyud ang mga way puas nga serbisyo sa mga doctor sa mga district hospitals sa tibuok probisnya. (PGO-Media Bureau/PIA-Surigao del Norte)
