Earthquake drill sa Dinagat Islands, nagmalampuson
DINAGAT ISLANDS --Malampusong mingpartisipar ang probinsya sa Dinagat Islands sa 2nd quarter Nationwide Simultaneous Earthquake Drill (NSED) niadtong Hunyo 19.
Gipangunahan sa Provincial Disaster Risk Reduction Managament Office (PDRRMO) kauban ang Provincial Capitol Disaster Control Group (PCDCG), ug mga national line agencies ang drill sa kapitolyo sa probinsya.
Ang partisipasyon sa Provincial Disaster Risk Reduction Council ug gobyerno sa probinsya sa Dinagat sa NSED usa ka dakong papel para manguna sa paghatag og tukmang impormasyon sa komunidad para mamahimong luwas sa panahon nga dunay emerhensya ug katalagman.
Dungan nga nag duck, cover, and hold ang mga partisipante diin gipakita usab sa gibuhat nga drill ang insaktong pagresponde pamaagi sa emergency extrication technique ug initial response sa pagbakwit.
Ang NSED usa ka inisyatibo sa gobyerno para mas mapalig-on ang kaandam sa mga katawhan kung dunay mahitabong linog.
Kini usa ka pamaagi para masuta ang mga tukma nga pagabuhaton sa panahong wala pa ang linog, kung mahitabo na, ug pagkahuman sa paglihok sa yuta.
Nasuta usab sa drill ang mga angay pang palambuon para mamahimong mas malig-on ug andam ang mga empleyado ug mga katawhan sa probinsya sa Dinagat. (PDRRMC Dinagat Islands/ PIA Dinagat Islands)